Jetisý oblystyq bilim basqarmasynyń burynǵy basshysy 11 jylǵa bas bostandyǵynan aıyryldy, dep habarlaıdy “Adyrna” ulttyq portaly Joǵarǵy sottyń baspasóz qyzmetine siltep.
Oblystyń mamandandyrylǵan aýdanaralyq qylmystyq sotynyń sheshimimen, sottalýshy QK-nyń 366-babynyń 4-bóligi jáne 24-babynyń 3-bóligi boıynsha kináli dep tanyldy.
«Burynǵy bilim bóliminiń bastyǵy býhgalter men onyń eki sybaılasynyń iri mólsherde bıýdjet qarajatyn jymqyrǵanyn anyqtaǵan (olarǵa qatysty jymqyrý faktisi boıynsha jeke qylmystyq is júrgizilýde). Óziniń qyzmettik jaǵdaıyn paıdalana otyryp, ol býhgalterden atqaryp otyrǵan laýazymyn bosatýdy nemese qamqorlyǵy úshin 380 mln teńge para berýdi talap etken. Býhgalter men onyń sybaılastary 200 mıllıon teńge jınap, ony kólik júrgizýshisi arqyly bólim bastyǵyna bergen», - delingen aqparatta.
Keıinirek, basshy paranyń qalǵan somasyn talap etkende, býhgalter quqyq qorǵaý organdaryna júginip, basshy 80 mıllıon teńge para alǵan kezde ustalǵan.
Sottalýshynyń kinási kýágerlerdiń aıǵaqtarymen, sot saraptamalarynyń qorytyndylarymen, qylmystyq is materıaldarymen jáne is boıynsha jınalǵan basqa da dáleldemelermen rastalady.
Prokýror sottalýshyny 11 jylǵa bas bostandyǵynan aıyrýdy surady. Qorǵaýshy tarap aqtaý úkimin surady. Sottalýshy kinásin moıyndamady.
«Sot jaza taǵaıyndaý kezinde qylmystyq jaýaptylyq pen jazany jeńildetetin mán-jaıdy asyraýynda jas balalardyń bolýyn eskerdi. Aýyrlatatyn mán-jaı – memlekettik qyzmetshiniń antyn buzý. Sottalýshy QK-nyń 366-babynyń 4-bóligi jáne 24-babynyń 3-bóligi boıynsha kináli dep tanyldy. Ol 11 jylǵa bas bostandyǵynan aıyryldy», - delingen sot úkiminde.
