Asqar Mamınniń buıryǵy boıynsha Arystaǵy úıler 1 tamyzǵa deıin jóndeýden ótýi kerek bolatyn. Alaıda, turǵyndardyń qaıta qalpyna keltirý jumystaryna kóńilderi tolmaı otyr. Olardyń aıtýynsha qarajat bárine jetken joq. Jetken kúnniń ózinde úıdi tolyq jóndeýge tym az deıdi.
"Eshqandaı múmkindik joq. Maǵan "Kútkilerińiz kelmese, ózderińiz adam jaldańyzdar" dep aıtty. Qurlysshylar maǵan 200 myń teńge dep eseptep berdi. Shtabqa barǵanymda tek 80 myń bere alatyndaryn aıtty. Al qalǵan aqshany qaıdan alamyn. Biz járdemaqyǵa ǵana ómir súrip júrmiz", - deıdi qala turǵyny Dınara Táshimbetova.
Sonymen qatar, qaladaǵy halyqtyń basym kópshiligi turǵyn úılerin óz qarajattaryna jóndep jatyr. Al jaǵdaı kelmeıtin otbasylardyń baspanalary ózgerissiz qıraǵan kúıi tur.
"Tipti syrtqy esik pen tereze qoıatyn shamamyz joq. Mundaı jaǵdaıda ómir súrýdiń ózi qorqynyshty. Bizdi bılik tastap ketti. Bireýlerdiń úılerin qalpyna keltirip jatqanyn kóresiń. Alaıda, munyń bári óz qarajatyna jasalyp jatyr eken", - deıdi Alena Prostına.
Tipti jóndeý jumystary júrgizilip jatsa da, kóptegen olqylyqtar baıqalyp, qalaı bolsa, solaı jasalǵan qurlys adamdardyń kóńilin kónshitpeıdi. Olar balalarynyń qaýipsizdigine alańdap, isti óz qoldaryna alǵan.
"Úsh ret komıssııa keldi. Tek sylaımyz degen bolatyn. Qabyrǵalarǵa qarańyzdarshy jaryq ótip tur. Meniń alty balam bar, erteń olarǵa birnárse bolsa kim jaýap beredi. Maǵan mundaı jóndeý jumystary kerek emes", - deıdi Nurlan Esimov.
Al shtabtaǵylar bul máseleni ózderinshe túsinderdi. Olardyń aıtýynsha qarajat qana emes, qurlys materıaldary men mamandar da óte tapshy eken.
"Qarjylandyrý árıne qıyn másele. Ekinshi ret qarjy tússe, jumys aldyǵa basady. Mamandardyń jetispeýinen, jumys satyly túrde júretin bolǵandyqtan kidirister bolyp jatyr. Sonymen qatar, qurlys materıaldary da jetkiliksiz", - deıdi Nur-Sultan shtabynyń ókili Arýjan Buǵybaeva.
"Adyrna" ulttyq portaly
