Múgedekter arasyndaǵy júzýden el chempıony kómekke muqtaj, dep habarlaıdy "Adyrna" ulttyq portaly KTK telearnasynyń jańalyqtaryna siltep.
Paralımpıadalyq oıyndardyń júldegeri Mıhaıl Melnık sporttan qol úzgen. Sportshy ulttyq qurama sapynan shyqqan soń syıaqy almaǵan. Sportshy úshinshi toptaǵy múgedektigine alatyn zeınetaqysynyń kúnkóriske jetpeıtinin málimdegen. Onyń aılyq zeınetaqysy - elý myń teńge.
53 jastaǵy Mıhaıl Melnık on jyl buryn densaýlyǵynan aıyrylǵan. Qurylys alańynda aıaǵyna tas plıta qulaǵan azamat múgedekter arasyndaǵy júzýden el chempıony.
"Qazir alatyn zeınetaqym eshteńege jetpeıdi. Azyq-túlik alsam, aı saıynǵy kommýnaldyq tólemderdi óteı almaı otyramyn. Elý myń teńgege ne alamyn? Eń bolmaǵanda, ekinshi topqa aýystyrsa, jıyrma myń teńgege zeınetaqym óser edi ǵoı", - deıdi Mıhaıl Melnık.
Sportshy sońǵy eki jylda jattyǵýǵa barýdy múldem qoıyp, jarysqa da shyqpaǵan kórinedi.
"Osy birinshi oryn alǵany úshin ol kisige 40 aılyq kórsetkish taǵaıyndaldy 2021 jyly. Sol kelesi 2022 jylǵa deıin alǵan bolatyn. Endi ár sportshy jańaǵy stıpendııasyn jalǵastyryp alý úshin kelesi jylǵa da óz nátıjesin kórsetý kerek. Respýblıkalyq oryndar alý kerek", - deıdi múgedekterge arnalǵan sport klýbynyń ádiskeri Nursultan Eleý.
