Aǵymdaǵy oqý jylynda Oral qalasy boıynsha 11 synypty 2480 túlek aıaqtaǵaly tur. Onyń ishinde 40 túlek Altyn belgige, 110-y úzdik attestatqa úmitker. 9 synypty 4917 oqýshy aıaqtasa, 223-i úzdik attestattan úmitti. Mektepterde oqý sabaqtary 25 mamyrda aıaqtalady. Bul týraly Oral qalalyq bilim berý bóliminiń basshysy Aqjarqyn Temirhanova málimdedi.
Qalanyń bas ustazynyń aıtýynsha, oqý jylynyń aıaǵynda qala mektepterindegi oqýshylar sany 0-11 synyp aralyǵynda 64401 oqýshyny qurady. Bıyl 24 mamyr kúni jalpy bilim beretin mektepter bekitilgen keste boıynsha sabaqtar ótkizedi jáne oqý kúnin «Bilimim Otanyma» atty synyp saǵatymen aıaqtaıdy. Túlekter úshin saltanatty shara 25 mamyr kúni uıymdastyrylady.
– 9-synyp bitirýshiler úshin qorytyndy mektep bitirý emtıhandary 29 mamyr-10 maýsym aralyǵynda ótedi, al 11-synyp bitirýshiler úshin memlekettik emtıhandar 28 mamyr-11 maýsym aralyǵynda bolady. Jalpy orta bilim berý týraly attestatty 11-synyp túlekterine tapsyrý saltanaty óz mektepteriniń qabyrǵasynda 14-17 maýsymda ótkiziledi. UBT tapsyrýǵa tilek bildirip, tirkelip otyrǵan oqýshy sany – 2085 (84 paıyz). Sonymen qatar bıyl Oqý aǵartý mınıstrliginiń №96 buıryǵyna sáıkes barlyq mektepterde 5-8, 10 synyptarǵa 27-31 mamyr aralyǵynda qazaq tili páninen emtıhan ótkiziletin bolady. 2024 jylǵy 27 mamyr men 31 mamyr aralyǵynda jáne aǵymdaǵy jylǵy 26-30 tamyz aralyǵynda oqýshylardyń bilim sapasyn arttyrý, bilim alýshylardyń, sonyń ishinde úlgerimi tómen oqýshylardyń bilimindegi olqylyqtardy tolyqtyrý maqsatynda barlyq mektepte jazǵy mektep jumys isteıtin bolady. Jazǵy mektep kóktemgi sý tasqynynan zardap shekken óńirlerdiń bilim alýshylary úshin, sondaı-aq qys mezgilinde qatty aıazǵa baılanysty sabaqtar toqtatylǵan óńirlerdiń bilim alýshylary úshin uıymdastyrylady. Jazǵy mekteptegi sabaqtar oqýshylardyń suranystary men qajettilikterin eskere otyryp, saralanǵan, jeke tásilder negizinde uıymdastyrylady. Klımattyq jaǵdaılardy eskere otyryp, bastaýysh synyptarda sabaqtar 30 mınýttan, 5-10 synyptarda 40 mınýtqa deıin ótkiziledi. Kúnine 5 sabaqtan artyq emes, – deıdi Aqjarqyn Mútıǵollaqyzy.
Al oqý jylyna 1 synypqa qabyldaý 1 sáýirden bastalyp, 31 tamyzǵa deıin elektrondy túrde egov.kz portaly arqyly júrgizilýde. Qazirgi tańda 1 synypqa 3000 oqýshy qabyldansa, sonyń 1954-i qazaq synyptaryna barady.
Qazaq tilinde ashylǵan synyptar úshin ata-analarǵa qoldaý kórsetý maqsatynda uzartylǵan kún toptary uıymdastyrylady. Mektepke deıingi uıymdarǵa oryndar bólýde ashyqtyq pen aıqyndyqty qamtamasyz etý maqsatynda kezekti esepke alýdyń biryńǵaı bazasy ázirlengen. Jańa model otbasylyq suranystarǵa negizdelgen tórt balabaqshany tańdaýǵa múmkindik beredi. Sonymen qatar balabaqshaǵa kezek kelgen ýaqytta avtomatty túrde beriletin bolady. Kezekti esepke alýdyń biryńǵaı bazasy Oral qalasynda osy jyldyń 20 mamyrynan bastap iske qosyldy. Balabaqshaǵa kezekke qoıý balabaqsha.snation.kz portaly, egov.kz portaly arqyly jáne ekinshi deńgeıli bankterdiń qosymshalary arqyly júzege asady.
Mektepke deıingi uıymdarda oryndardy bólý kezinde sybaılas jemqorlyq quramdas bólikterin joıý maqsatynda kezektilikti esepke alýdyń biryńǵaı bazasy ázirlendi. Jańa model ata-analardyń suranystaryna negizdelgen tórt balabaqshany tańdaýǵa múmkindik beredi. Mektepke deıingi uıymdarǵa oryn kezek kelgende avtomatty túrde beriledi. Oral qalasynda kezektiń biryńǵaı bazasy 2024 jylǵy 20 mamyrdan bastalady. Mektepke deıingi uıymdarǵa kezekke qoıý portaldarda balabaqsha.snation.kz, egov.kz jáne ekinshi deńgeıdegi bankterdiń qosymshalarynda júzege asyrylady.
Bilim alýshylardyń jazǵy demalysy 2024-2026 jyldardaǵy jazǵy kanıkýl kezeńinde balalardyń saýyqtyrý demalysyn, bos ýaqytyn jáne jumyspen qamtylýyn uıymdastyrý jónindegi Qazaqstan Respýblıkasy Bilim Mınıstrliginiń is-sharalar josparyna sáıkes uıymdastyrylatyn bolady.
– Bilim berý bólimine qarasty «Atameken» qalalyq balalar-jasóspirimder týrızmi jáne ekologııa ortalyǵynda úsh aıda 3430 oqýshy demalady dep josparlandy. Onyń ishinde áleýmettik jaǵynan az qorǵalǵan, jetim, ata-anasynyń qamqorlyǵynsyz qalǵan 400 bala bar. «Atameken» lagerinde týrıstik-ólketaný jáne áskerı-patrıottyq baǵyttar boıynsha balalardyń demalysy uıymdastyrylady.
230 daryndy oqýshy 50 paıyz jeńildikpen demalady, – deıdi bul týrasynda Aqjarqyn Temirhanova.
Qalanyń 47 mektebindegi tamaqtanýy uıymdastyrylǵan lagerde 6500 bala, 50 mekteptegi jáne 2 qosymsha bilim berý uıymyndaǵy (mektepten tys jumys ortalyǵy, Oqýshylar saraıy) tamaqtaný uıymdastyrylmaǵan lagerde 45 050 bala demalysyn ótkizedi dep kútilýde. Sonymen qatar Borovoe kýrorttyq aýmaǵyndaǵy lagerlerde jekelegen sanattaǵy otbasylardan 150 balanyń demalysy jáne ár mektepten qamtylatyn Astana qalasyna osy sanattaǵy 50, Shymkent qalasyna 50, Túrkistan qalasyna 50 oqýshynyń ekskýrsııasy qarastyrylǵan. Al sý tasqyny kezinde evakopýnktte bolǵan 540 oqýshy úshin Vetelkı aýylyndaǵy №29 mektebiniń bazasynda etnolager uıymdastyrylmaq. Bul maqsatqa bıýjdjetten 37 684 myń teńge baǵyttalǵan.
