Bıyl shegirtke zııankesterimen kúresýge respýblıkalyq bıýdjetten 8,1 mlrd teńge bóldi. Bul týraly premer-mınıstr Oljas Bektenov aıtty, dep habarlaıdy «Adyrna» tilshisi.
«Fıtosanıtarııalyq jaǵdaıǵa erekshe nazar aýdarǵan jón. Shegirtkeniń tabıǵı túrde eń kóp taralýy 2024 jylǵa kelip tur. Bul máselege qatań jaýapkershilikpen qaraý kerek. Aýyl sharýashylyǵy mınıstrligine oblys ákimdikterimen birlesip, zııankesterdiń taralý oryndaryn anyqtaýǵa qosymsha resýrstardy jumyldyrýdy jáne óńdeý jumystaryn baqylaýǵa alýdy tapsyramyn. Kóktemgi egis jumystaryn júrgizý boıynsha barlyq máseleler jedel sheshimin taýyp, turaqty baqylaýda bolýy tıis», — dedi Úkimet basshysy.
Aıta keteıik, ótken jyly elimizde shegirtkege qarsy kúreske 3,8 mlrd teńge bólingen edi.
