Astanada kámeletke tolmaǵan oqýshy qyzdyń ákesi mektepte oramal taǵýǵa tyıym salýdy negizsiz dep sanady, dep habarlaıdy "Adyrna" ulttyq portaly.
Astana qalasynyń kámeletke tolmaǵandardyń isteri jónindegi sottyń málimetinshe, aryzdanýshy óz shaǵymynda bul tyıym balanyń quqyǵyn shekteıdi dep málimdegen.
“Kámeletke tolmaǵan qyzdyń ákesi "mektep formasyn kıgen kezde dinı sıpattaǵy kıim men nyshandardy kııýge jol berilmeıdi" dep kózdelgen qaǵıdalardyń 16-tarmaǵy 2) tarmaqshasyn zańsyz dep tanyp, sotqa júgindi. Talap qoıýshy "shash pen moıyndy jabatyn bas oramalyn" dinı sıpattaǵy kıim dep sanamaıdy”, – delingen habarlamada.
Sot aryzdanýshynyń talabyna baılanysty "Bilim týraly" zań men mektep jarǵysynda mektep formasy barlyq oqýshylarǵa birdeı, dinı jáne ózge de erekshelik belgilerinsiz bolýy kerek dep belgilengenin atap ótti. Osylaısha, sot aryzdanýshynyń shaǵymyn qanaǵattandyrmady.
