Ázerbaıjan astanasy Bakýde Túrki áleminiń ortaq álipbıi jónindegi komıssııasynyń ekinshi otyrysy ótti, dep habarlaıdy “Adyrna” ulttyq portaly QazAqparatqa siltep.
Atalǵan jıyndy Túrki akademııasy Ázerbaıjan ulttyq ǵylym akademııasy Nasımı atyndaǵy til bilimi ınstıtýtynyń qoldaýymen, Atatúrik atyndaǵy mádenıet, til jáne tarıh joǵary keńesi janyndaǵy Túrik tili qoǵamymen birlesip uıymdastyrdy. Onda baýyrlas memleketterdiń ókilderi ortaq álipbı ıdeıasyn ilgeriletý jáne osy baǵyttaǵy jańa qadamdardy talqylady. Komıssııa otyrysynyń ashylý saltanatynda sóz sóılegen Shahın Mustafaev ortaq álipbı máselesi — túrki halyqtary yntymaqtastyǵynyń mańyzdy baǵyty ekenin atap ótti.
«Túrki áleminiń birligin nyǵaıtý úshin álipbı birligine de mán berilýi tıis. Sońǵy jyldary túrki memleketteri arasyndaǵy yntymaqtastyq ınstıtýıonaldy sıpatqa ıe bolǵan saıyn, ortaq álipbı máselesi kún tártibinde jıi kóterile bastady, - dedi Mustafaev.
Basqosýǵa Túrik tili qoǵamynyń prezıdenti Osman Mert, Ázerbaıjan Ulttyq ǵylym akademııasynyń prezıdenti Isa Gabıbbeılı, Atatúrik ortalyǵynyń tóraǵasy Nızamı Djafarov jáne TMU aqsaqaldar keńesiniń múshesi Gasan Gasanov, sonymen qatar Túrki memleketteri uıymyna múshe elderden jáne baqylaýshy memleketterden kelgen komıssııa músheleri men til bilimi salasyndaǵy ǵylymı-zertteý ınstıtýttardyń ǵalymdary qatysty.
Aıta keteıik, Túrki akademııasynyń bazasynda jumys isteıtin komıssııa ár taraptan lıngvıstıkalyq salaǵa jaýapty eki músheniń qatysýymen qurylǵan edi. Komıssııanyń alǵashqy otyrysy 2023 jyldyń 29 mamyrynda Astana qalasynda ótip, birqatar mańyzdy sheshim qabyldanǵan bolatyn.
