1917 jyly 25 sáýir - 7 mamyr aralyǵynda Ombyda Aqmola oblysy qazaqtarynyń sezi ótti.
Sezge Aqmola, Atbasar, Omby, Kókshetaý, Qyzyljar qalalarynan 250-ge tarta ókil qatysty. Orynbordan Mirjaqyp Dýlatuly arnaıy shaqyryldy. Sezdiń kún tártibinde memlekettik qurylymǵa, jerge baılanysty qazaq komıtetterin qurýǵa, dinge, jerge, bilimge, sot isterine, quryltaı ótkizýge, soǵys jaǵdaıy men áıelder isine qatysty 17 másele shyǵaryldy.
Sezdiń tóralqasy quramyna A. Turlybaev (tóraǵa), E. Itbaev pen M. Dýlatov (tóraǵa orynbasarlary), M. Samatov, A. Seıitov jáne E. Toqabaev (hatshylary) saılandy.
Kóterilgen másele boıynsha tıisti sheshimder qabyldandy. Bul sheshimder meml. qurylys jóninde:
Reseı demokr., bir ortalyqqa qatań baǵyndyrylmaǵan respýblıka bolsyn, al búkilreseılik quryltaı jınalysyna ár halyqtan sanyna qaraı depýtat saılansyn, saılaýǵa áıelder de qatynassyn; jer máselesi boıynsha qonys aýdarý toqtatylsyn, buryn alynǵan jerler keri qaıtarylsyn, oblysqa zemstvolyq basqarý engizilsin, mektepterde oqý ana tilinde júrgizilsin degen mazmunda boldy. 1917 jyly mamyr aıynda Máskeýde ótetin jalpyreseılik musylman sezine delegat retinde M. Jumabaev saılandy.
Sez barysynda 10 adamnan turatyn arnaıy komıtet quryldy, onyń quramynda: Aıdarbek Turlybaev (tóraǵa), Seıilbek Janaıdarov (tóraǵa orynbasary), Asylbek Septov, Qazy Tursynov, Ermuhamed Toqbaev, Tórebaı Nuralın, Sádýaqas Jantasov, Erqosaı Mukyshev, Baıseıit Ádilov, Maǵjan Jumabaevtar boldy.
