1917 jyly 25 säuır - 7 mamyr aralyǧynda Ombyda Aqmola oblysy qazaqtarynyŋ sezı öttı.
Sezge Aqmola, Atbasar, Omby, Kökşetau, Qyzyljar qalalarynan 250-ge tarta ökıl qatysty. Orynbordan Mırjaqyp Dulatūly arnaiy şaqyryldy. Sezdıŋ kün tärtıbınde memlekettık qūrylymǧa, jerge bailanysty qazaq komitetterın qūruǧa, dınge, jerge, bılımge, sot ısterıne, qūryltai ötkızuge, soǧys jaǧdaiy men äielder ısıne qatysty 17 mäsele şyǧaryldy.
Sezdıŋ töralqasy qūramyna A. Tūrlybaev (töraǧa), E. İtbaev pen M. Dulatov (töraǧa orynbasarlary), M. Samatov, A. Seiıtov jäne E. Toqabaev (hatşylary) sailandy.
Köterılgen mäsele boiynşa tiıstı şeşımder qabyldandy. Būl şeşımder meml. qūrylys jönınde:
Resei demokr., bır ortalyqqa qataŋ baǧyndyrylmaǧan respublika bolsyn, al bükılreseilık qūryltai jinalysyna är halyqtan sanyna qarai deputat sailansyn, sailauǧa äielder de qatynassyn; jer mäselesı boiynşa qonys audaru toqtatylsyn, būryn alynǧan jerler kerı qaitarylsyn, oblysqa zemstvolyq basqaru engızılsın, mektepterde oqu ana tılınde jürgızılsın degen mazmūnda boldy. 1917 jyly mamyr aiynda Mäskeude ötetın jalpyreseilık mūsylman sezıne delegat retınde M. Jūmabaev sailandy.
Sez barysynda 10 adamnan tūratyn arnaiy komitet qūryldy, onyŋ qūramynda: Aidarbek Tūrlybaev (töraǧa), Seiılbek Janaidarov (töraǧa orynbasary), Asylbek Septov, Qazy Tūrsynov, Ermūhamed Toqbaev, Törebai Nūralin, Säduaqas Jantasov, Erqosai Mūkyşev, Baiseiıt Ädılov, Maǧjan Jūmabaevtar boldy.
