Qazaqstannyŋ Fransiiadaǧy Elşılıgınde Europa elderınde tūratyn otandastar men qandastardyŋ basqosuy saltanatty türde aşyldy. Is-şara Qazaqstannyŋ Fransiiadaǧy Elşılıgı jäne Qyzylorda oblysy äkımdıgınıŋ qoldauymen, «Otandastar qory» KeAQ men Qazaq-fransuz-türık qauymdastyǧynyŋ (AKFT Paris) bırlesken ūiymdastyruymen ötkızıldı.
Negızgı maqsaty – şeteldegı qazaq diasporasynyŋ bırlıgın nyǧaitu, tarihi Otanmen bailanysty damytu jäne mädeni-gumanitarlyq yntymaqtastyqty damytu.
Is-şaranyŋ aşyluynda Qazaqstannyŋ Fransiiadaǧy Tötenşe jäne Ökılettı Elşısı Gülsara Arystanqūlova, Qyzylorda oblysy äkımınıŋ orynbasary Ardaq Zebeşev, «Otandastar qory» KeAQ vise-prezidentı Alibek Jūrqadam, Türkiianyŋ Ädılet jäne damu partiiasy töraǧasynyŋ orynbasary Raşida Iýksel, Qazaq-fransuz-türık qauymdastyǧynyŋ töraǧasy Rejep Giunai jäne «Tildes KZ» Speaking jobasynyŋ jetekşısı Larisa Aldabergenova söz söiledı.
Qazaqstan Elşısı öz sözınde Parij törınde būl basqosudyŋ şeteldegı qazaqtardyŋ ruhani bırlıgın nyǧaitatyn maŋyzdy alaŋǧa ainalǧanyn atap öttı. Ol qazaq halqynyŋ tarihi tamyry Altyn Orda mūrasymen sabaqtas ekenın aityp, bügınde Qazaqstannyŋ Europa men Aziiany jalǧaityn senımdı köpır retındegı rölı artyp kele jatqanyn erekşe jetkızdı. Sonymen qatar, ana tıl, ūlttyq ruh jäne tarihi jady barşa qazaqty bırıktıretın basty qūndylyqtar ekenın nazar audardy.
Jiyn aiasynda «Otandastar qory» KeAQ qazaq qauymdastyqtarynyŋ jetekşılerı men belsendılerınıŋ qatysuymen döŋgelek üstel ötkızdı. Kezdesu barysynda «Otandastar qory» KeAQ vise-prezidentı Alibek Jūrqadam ūiymnyŋ qyzmetı men jüzege asyryp jatqan jobalary turaly aqparat berıp, qatysuşylardy ortaq bastamalarǧa belsendı qatysuǧa şaqyrdy. Sondai-aq, qatysuşylar aldaǧy kezeŋdegı bırlesken jobalar men yntymaqtastyq baǧyttaryn talqylady.
Baǧdarlama aiasynda Qyzylorda oblystyq filarmoniiasynyŋ önerpazdary konserttık baǧdarlama ūsynyp, öŋır qolönerşılerı ūlttyq qolöner būiymdarynyŋ körmesın ūiymdastyrdy. Otandastardyŋ basqosuy aldaǧy ekı kün boiy jalǧasady. Baǧdarlama aiasynda Garj-le-Goness qalasynda Europadaǧy qazaq jastary arasynda futbol turnirı ötkızılıp, sondai-aq mädeni-köpşılık ıs-şaralar men ūlttyq mädenietke arnalǧan arnaiy baǧdarlama ūiymdastyrylady.
Basqosuǧa Ūlybritaniia, Germaniia, Niderland, Finliandiia, İspaniia, Norvegiia, Şveisariia, Fransiia, Chehiia, İtaliia, Portugaliia, Polşa, Şvesiia, Daniia, Belgiia, Majarstan, Türkiia men Moŋǧoliiadan kelgen qazaqstandyqtar men qandastar qatysty.
