Eks-prezıdent Nursultan Nazarbaevtyń kúıeýbalasy, mıllıarder, kásipker Tımýr Qulybaev Atyraý oblysyndaǵy sý tasqyny zardaptaryn joıyp, óńirdi qalpyna keltirýge 30 mlrd teńge bóledi. Bul týraly Energy monitor telegram-arnasy jarııalady, dep habarlaıdy “Adyrna” ulttyq portaly.
Qarajat turǵyn úılerdi jóndeýge jáne jańadan salýǵa, ınfraqurylymdy qalpyna keltirýge, sondaı-aq tabıǵı apattan zardap shekkenderge kómek kórsetýge jumsalady. Shyǵyn eseptelip bolǵasyn, bul jumystar shuǵyl túrde júrgiziledi.
«Sý tasqynynan zardap shekken árbir jannyń qaıǵysyna ortaqpyn. Apattyń alǵashqy kúnnen bastap qarǵyn sýdyń astynda qalǵan aımaqtarǵa kómek qolyn sozdyq. Prezıdent Qasym-Jomart Toqaevtyń basshylyǵymen barlyq qıyndyqty eńseretinimizge senimdimin», - dedi Tımýr Qulybaev.
Aıta keteıik, qazaqstandyq kásipkerler men belsendi azamattar memleket basshysy Qasym-Jomart Toqaevtyń sý tasqynynyń saldaryn joıýda birlesip áreket etý týraly usynysyn qoldady.
Eske salaıyq, buǵan deıin Tımýr Qulybaevtyń baqylaýyndaǵy Atlas Development jáne Omirex kompanııalary ál-Farabı atyndaǵy Qazaq ulttyq ýnıversıtetiniń (QazUÝ) bızneske ótken jer ýchaskeleri boıynsha ótken sotta jeńilgenin habarlaǵan edik.
