Reseı prezıdentiniń ókili Qorǵan jáne Túmen oblystaryndaǵy sý tasqynyna Qazaqstandy kinálady, dep habarlaıdy "Adyrna" tilshisi RBK-ǵa siltep.
Pýtınniń Oral federaldy okrýgindegi ókiletti ókili Iakýshev Qorǵan jáne Túmen oblystaryndaǵy sý tasqynyn boldyrmaý úshin Qazaqstan óziniń sý qoımalar júıesine sýdy «kelisilgen túrde jiberýge mindetti edi" degen pikir bildirgen. Onyń aıtqany Qazaqstan osylaı jasamaǵan soń Qorǵan men Túmen jerin sý alyp ketti degenge saıady. Sońynan ol sóziniń lámin jumsartqandaı jalpylama sóılegen.
«Bizde osyndaı qys bolǵan kezde jáne qardyń mólsheri aıtarlyqtaı kóp bolsa, sý qoımasynda jetkilikti mólsherde sý jınalatyn bolsa, bizdiń áriptesterimizben [qazaqstandyq] osy másele boıynsha jumys isteýimiz kerek», - dedi Iakýshev RBK telearnasyndaǵy suhbatynda.
Onyń aıtýynsha, aldaǵy ýaqytta Qazaqstanda aǵyndy sýlardy retteý arqyly birneshe aýmaqta sý tasqyny máselesin boldyrmaýǵa bolady.
Al osy ýaqytta Qorǵan turǵyndary «úlken sýǵa» daıyndalýda. Iakýshev qabyldanǵan sharalar apatty jeńýge «100%» kómektesetinine kepildik bermedi degen.
Pýtınniń Oral federaldy okrýgindegi ókiletti ókiliniń aıtýynsha, Qorǵan oblysyndaǵy tótenshe jaǵdaıdy sheshkennen keıin qutqarýshylar sý tasqyny bolýy múmkin Túmen oblysyna jiberiledi.
Al naýryz aıynyń ortasynan bastap Qazaqstanda eldi mekenderdi sý tasqyny bastady. Eldiń birneshe aımaǵynda jergilikti tótenshe jaǵdaı jarııalandy. Respýblıka Prezıdenti Qasym-Jomart Toqaev olardy sońǵy 80 jyldaǵy eń iri tabıǵı apat dep ataǵan bolatyn. Al Reseıde sońǵy 100 jylda buryn sońdy bolmaǵan tasqyn jaıynda aıtylady.
