Reseı basshysy Vladımır Pýtın taktıkalyq ıadrolyq qarýdyń alǵashqy partııasy Belarýske jetkizilgenin málimdedi. Bul jóninde TASS agenttigi habarlady, dep jazdy "Adyrna" ulttyq portaly.
"Taktıkalyq qarýdyń bir bóligin Belarýs aımaǵyna ornatamyz. Alǵashqy ıadrolyq zarıadtar Belarýske jetkizilip te qoıdy. Jazdyń sońyna deıin jumysty tolyq bitiremiz", - dedi Pýtın.
Azattyq radıosynyń jazýynsha, 9 maýsymda Belarýstiń avtorıtar basshysy Aleksandr Lýkashenkomen kezdesý kezinde Pýtın reseılik taktıkalyq ıadrolyq qarýlar Belarýske 2023 jyldyń shilde aıynda ornalastyryla bastaıtynyn aıtqan. Onyń sózinshe, taktıkalyq ıadrolyq qarý saqtaýǵa arnalǵan jabdyqtar 7-8 shildede daıyn bolady. Izinshe Reseı jaǵy ıadrolyq qarýdy tasymaldaı bastaıdy.
Naýryz aıynda Pýtın Reseı Belarýste taktıkalyq ıadrolyq qarýyn ornalastyrady dep málimdegen. Buǵan qosa, Belarýske "Iskander" raketa kesheni berilgeni aıtylǵan. Reseı jaǵynyń aıtýynsha, "Iskander-M" zymyranyn ballıstıkalyq zymyran retinde de, "qanatty zymyran" retinde de, ıaǵnı ıadrolyq qarý atýǵa da paıdalanýǵa bolady. Reseı qorǵanys mınıstri Sergeı Shoıgý buǵan deıin Reseı ıadrolyq qarýyn Belarýske ornalastyrsa da, ony qoldaný týraly sheshimdi Máskeý ózi qabyldaıdy degen.
Mamyrdyń sońynda eki jaq tıisti qujattarǵa qol qoıǵan.
13 maýsymda Lýkashenko Belarýs reseılik taktıkalyq ıadrolyq qarýdy ala bastady dep aıtqan. Onyń sózinshe, keıbiri AQSh-tyń Hırosıma jáne Nagasakıde qoldanǵan bombasynan "úsh ese qýatty". Ol sol kezde Pýtınnen "jáı ǵana suramaǵanyn", Belarýstiń taktıkalyq ıadrolyq qarýyn qaıtarýdy "talap etkenin" aıtqan.
Ýkraınanyń ulttyq qaýipsizdik jáne qorǵanys keńesiniń hatshysy Alekseı Danılov Pýtınniń Belarýske taktıkalyq ıadrolyq qarý ornalastyrýy – eldiń ishindegi jaǵdaıdy turaqsyzdandyrýǵa baǵyttalǵan qadam dep aıtqan. Onyń pikirinshe, bul belorýs qoǵamynda Reseı men Pýtınge qatysty teris kózqarastyń qalyptasýyna yqpal etedi. "Kreml Belarýsti ıadrolyq kepildikke aldy" dedi Danılov. Ýkraına prezıdenti keńsesiniń ókili Mıhaıl Podolıak Máskeý Ýkraınadaǵy soǵysta jeńiliske ushyraıtynyn túsingendikten osyndaı qadamǵa baryp otyr dedi.
"Adyrna" ulttyq portaly
