Ózbekstan prezıdenti Shavkat Mırzıeevtiń tapsyrmasy boıynsha Qazaqstanda qaza tapqan Ózbekstannyń segiz azamatynyń máıitin jetkizip, sondaı-aq olardy jerleýdi uıymdastyrýmen aınalysatyn úkimettik komıssııa quryldy. Bul týraly Ózbekstannyń Tótenshe jaǵdaılar mınıstrliginiń baspasóz qyzmeti málimdedi, dep habarlaıdy “Adyrna” ulttyq portaly.
Aqparatqa sáıkes, marqumdardyń denesin tasymaldaý úshin Ózbekstan Qorǵanys mınıstrliginiń áskerı ushaǵy bólingen.
«Ózbekstannyń Tótenshe jaǵdaılar mınıstrligi qazaqstandyq áriptesterimen tyǵyz baılanysta, sondaı-aq bolǵan oqıǵanyń sebepterin zertteýde birlesip jumys isteýde», - delingen habarlamada.
Aıta keteıik, 3 sáýirde Aqtóbe oblysynyń Samara-Shymkent tas jolynyń Marjanbulaq aýylynyń mańynda Ózbekstan Respýblıkasynyń azamaty basqarǵan Volvo júk kóligi men Toyota-Alhpard mıkroavtobýstarynyń qatysýymen jol-kólik oqıǵasy bolǵan bolatyn. Aldyn ala málimet boıynsha, Ózbekstan azamattary kele jatqan Toyota mıkroavtobýsyn aqaýlyq saldarynan qarsy jolaqqa shyǵyp ketken júk kóligi qaǵyp ketken.
