Búgin Parlament Májilisinde «Qazaqstan Respýblıkasynyń keıbir zańnamalyq aktilerine oıyn bıznesi, lotereıalar jáne lotereıa qyzmeti máseleleri boıynsha ózgerister men tolyqtyrýlar engizý týraly» zań jobasy tanystyryldy, dep habarlaıdy "Adyrna" ulttyq portaly.
Májilis depýtaty Elnur Beısenbaev «uzaq talqylanyp, kópten kútken» zań jobasyn 1,5 jyl kútkenin aıtady.
«Osy kezeń ishinde qanshama talqylaý, qanshama pysyqtaý boldy. Qoǵam dertine aınalǵan bul másele jóninde qóptegen depýtattyq saýal joldanyp, arnaıy otyrystar uıymdastyryldy. Osyǵan jaýapty memlekettik mekemeler ókilderin shaqyryp, tyńdaý da ótkizdik. Eń bastysy, Májilistegi barlyq frakııa ókilderi osy zańǵa bastamashy bolyp otyr.
Sonymen birge, Prezıdent janyndaǵy jastar keńesiniń ókilderimen, Ulttyq Quryltaı múshelerimen de birge talqyladyq. Qoǵam belsendileri men sarapshylardyń qatysýymen qarastyrdyq. Qysqasy, zań jobasyna Úkimetten qorytyndy alý ońaı bolmady. Ádette, basqa zańdar boıynsha qorytyndyny 1-2 aı kútetin bolsaq, al bul zańǵa kelgende tym sozylyp ketti. Eki shaqyrylymdaǵy depýtattyq tájirıbemde osynshama uzaq ýaqyt boıy Úkimet qorytyndysyn alýdy birinshi kórip otyrmyn. Demek, munyń aınalasynda múddeli toptar, lobbıster bar degen sóz» – deıdi ol.
Depýtattyń aıtýynsha, oıyn bıznesinde úlken qarajat aınalyp jatyr. Máselen, byltyr býkmekerlik keńselerdiń jyldyq aınalymy beıresmı aqparattar boıynsha 1 trıllıon teńgege jetken.
«Búginde qumar oıyndary jyljymaıtyn múlik naryǵyn basyp ozyp, aldyńǵy orynǵa shyqqan. Sondyqtan osynaý zań jobasy óte ózekti ári qoǵam úshin mańyzdy ekeni anyq. Tipti bul máseleni el Prezıdenti Qasym-Jomart Toqaevtyń ózi birneshe ret kóterip, naqty tapsyrma berdi. Qaýipsizdik keńesiniń otyrysynda da, Ulttyq Quryltaıda birneshe ret erekshe toqtalǵanyn jaqsy bilesizder.
Shyny kerek, qazirgi tańda Qazaqstanda oıynqumarlyq indetteı órship, el qaýipsizdigine qater tóndire bastady. Onyń basty sebebi – qumar oıyndarynyń jurtshylyqqa ońaı qoljetimdi bolýy jáne ony uıymdastyrýshylardyń ınternettegi saıttarynyń keńinen taralýy.
Derekterge júginsek, sońǵy eki jarym jylda elimizdiń árbir besinshi adamy oıyn oınaıdy eken nemese qumar oıyndaryna qandaı-da bir qatysy bar. 400 myńdaı adam oıynǵa salynyp, býkmekerlik keńseler men kazınolardyń turaqty klıentine aınalǵan. Ajyrasýlardyń paıyzyna osy lýdomanııa tikeleı sebep bolyp otyr. Turmystyq zorlyq-zombylyqqa baratyndardyń deni – osy qumar oıynǵa shaldyqqandar. Máselen, 2022 jyly elimizde 3 myń 676 adam ózine qol jumsap qaıtys bolsa, olardyń árbir besinshisiniń sebebi – lýdomanııa», – dedi ol.
