Memleket basşysy Qasym-Jomart Toqaevtyŋ tapsyrmasy boiynşa Parlament Senatynyŋ Töraǧasy Mäulen Äşımbaev Resei Federasiiasynyŋ Qazaqstan Respublikasyndaǧy Elşılıgıne bardy. Būl turaly QR Parlamentı Senatynyŋ baspasöz qyzmetı mälımdedı, dep habarlaidy “Adyrna” ūlttyq portaly.
Palata Spikerı Mäskeu oblysynda bolǧan laŋkestık oqiǧaǧa bailanysty elımızdegı Resei Elşısıne köŋıl aitty. Sondai-aq köŋıl aitu kıtabyna jazba qaldyryp, gül şoǧyn qoidy. Ol ondaǧan jazyqsyz jannyŋ ömırın qiǧan qaiǧyly oqiǧany qazaqstandyqtar auyr küizelıspen qabyldaǧanyn atap öttı.
Senat Töraǧasy Resei Federasiiasynyŋ Qazaqstan Respublikasyndaǧy Tötenşe jäne Ökılettı Elşısı Aleksei Borodavkinmen sūhbat barysynda Qazaqstan Prezidentı Qasym-Jomart Toqaev beibıt azamattarǧa qarsy terroristık aktını qataŋ aiyptaǧanyn jäne laŋkestıkke qarsy küreste Reseimen bırge ekenın rastaǧanyn aitty.
«Qazaqstan Prezidentı Qasym-Jomart Kemelūly Toqaev BŪŪ-ǧa müşe memleketterdı jazyqsyz azamattarǧa qarsy zorlyq-zombylyqtyŋ būl türıne bırauyzdan qarsylyq tanytuǧa şaqyrdy. Adamdyqqa jat mūndai laŋkestık ärekettı mülde aqtauǧa bolmaidy. Qaiǧyly oqiǧaǧa bailanysty Qazaqstan Respublikasy Parlamentı Senaty deputattarynyŋ jäne jeke öz atymnan köŋıl aitamyn. Būl jaǧdai Resei halqymen bırge bızdıŋ azamattarymyzdyŋ da qabyrǧasyn qaiystyrdy. Oryn alǧan laŋkestıktı bız auyr küizelıspen qabyldadyq. Barlyq zardap şekkenderge sabyr tılei otyryp, olardyŋ tezırek sauyǧyp ketuıne tılektestıgımızdı bıldıremız», – dedı Mäulen Äşımbaev köŋıl aitu kıtabyna qaldyrǧan jazbasynda.
Eske sala ketsek, 22-şı nauryz künı Mäskeudıŋ soltüstık-batysyndaǧy «Crocus City Hall» konsert zalynda atys bolyp, kamufliaj kigen adamdar bebıt tūrǧyndarǧa oq jaudyrǧan.
Reseide 24 nauryz Jalpyūlttyq aza tūtu künı retınde jariialandy.Ūqsas jaŋalyqtar
