Máskeýdegi Crocus City Hall ǵımaratynda bolǵan teraktige qatysy bar degen kúdikpen Tájikstannyń eki azamaty ustaldy, dep habarlaıdy “Adyrna” ulttyq portaly Baza-ǵa siltep.
«Brıansk oblysynda Crocus City Hall ǵımaratyna shabýyl jasady degen eki kúdikti ustaldy. Qylmyskerler mingen kólik Belarýs jáne Ýkraına shekarasynan birneshe shaqyrym jerdegi Teply aýylynyń mańynda toqtatyldy. Aldyn ala málimet boıynsha, kólikte alty adam bolǵan: ekeýi ustaldy, taǵy tórteýi qashyp úlgergen. Ustalǵandar Tájikstan azamattary bolyp shyqty. Qazir olarmen qaýipsizdik qyzmetiniń qyzmetkerleri jumys istep jatyr - olardyń lańkestik áreketke qatysy bar-joǵy tekserilýde. Qazir taǵy tórteýi izdestirilýde», - delingen senbi kúni taratqan habarlamada.
Esterińizge sala keteıik, 22 naýryz kúni keshke Reseıdiń Krokýs Sıtı Hollynda belgisiz bireýler iri terakt jasaǵan bolatyn. Aldyn ala málimet boıynsha, ondaǵan adam qaza taýyp, 100-den astamy jaralanǵan. Krokýs Sıtı Holldaǵy teraktige baılanysty Qazaqstan azamattary úshin senim telefony ashyldy. Prezıdent Qasym-Jomart Toqaev Qazaqstan atynan Máskeýdegi Krokýs Sıtı Holldaǵy lańkestik áreketti qatań aıyptady. Aıta keteıik, Ýkraına lańkestik áreketke qatysy joqtyǵyn birden málim etti.
Buǵan deıin 7 naýryz kúni Reseıdiń Kalýga oblysynda Qazaqstannyń eki azamaty Federaldyq qaýipsizdik qyzmetiniń (FSB) arnaıy jasaq ofıerlerimen bolǵan atys kezinde qaza tapqan bolatyn.
