Astana qalasyndaǵy «Jekpe-jek» saraıynda Maqsut Narikbayev University óziniń 30 jyldyǵyna oraı saltanatty is-shara ótkizdi. Bul mańyzdy oqıǵa ýnıversıtettiń burynǵy jáne qazirgi professorlaryn, oqytýshylaryn, túlekterin jáne qyzmetkerlerin biriktirdi. Atalǵan merekelik is-sharaǵa 5 myńnan astam qonaq qatysty. Al keshtiń hedlaınerleri qazaqstandyq estrada juldyzdary Raim jáne Kalifarniya boldy.
Sondaı-aq kesh baǵdarlamasy aıasynda – ýnıversıtet týynyń ashylý rásimi ótti. Týdyń aýdany 850 sharshy metrdi qurady, atalǵan atrıbýt ýnıversıtettiń bilim berý jáne qoǵamdyq keńistiktegi kúshi men mańyzdylyǵyn kórsetti.
Shara aıasynda mektepter arasynda jarystyq doda ótkizildi. Bul saıysta ýnıversıtettegi tórt mektep jáne ákimshilik-basqarý personaly «Ýnıversıtetti úzdik quttyqtaý» ataǵy úshin ózara talasty.
Búgin biz ýnıversıtetimizdiń 30 jyldyq mereıtoıyna oraılastyrǵan óte mańyzdy oqıǵaǵa jınaldyq. 30 jyl óte az sııaqty kóringenimen, bizdiń qyzmetkerler, oqytýshylar jáne túlekterimizdiń arqasynda ýnıversıtetimiz eleýli nátıjege jetip, úlken joldan óttik. Ózderińiz biletindeı, bizdiń basty mıssııamyz – el múddesine qyzmet etý. Osy oraıda atalǵan qaǵıdatymyzdy oryndaý úshin qajyrly eńbek etken árbir MNU múshesine shyn júrekten alǵysymdy bildiremin», - dedi Basqarma Tóraǵasy Talǵat Nárikbaev.
Aıta ketý kerek, qatysýshylar bul sharaǵa úsh aı boıy daıyndalǵan. Ýnıversıtetti úzdik quttyqtaý baıqaýynda Joǵary quqyq mektebi jeńiske jetti. Stýdentter men oqytýshylardyń birlese usynǵan shyǵarmashylyq ónerleri qazylar alqasynyń joǵary baǵasyna ıe boldy.
Maqsut Narikbayev University tarıhy 1994 jyly 14 naýryzdan bastaý alady. Osy ýaqyt ishinde ýnıversıtet óz mıssııasyna saı, ıaǵnı Qazaqstan halqyna qyzmet etýdi basty qaǵıdaty sanaıtyn 40 myńǵa jýyq bilikti mamandar daıyndap shyǵardy. Maqsut Narikbayev University Qazaqstanda bilim berýdiń halyqaralyq deńgeıin usyna otyryp, elimizdiń ýnıversıtetteri arasynda kósh bastap tur. 30 jyl ishinde ýnıversıtet birneshe iri jetistikterge qol jetkizdi. Atap aıtqanda, TMD-da birinshi bolyp QAA akkredıtaııasyna ıe boldy, ACCA, CFA, CIMA, TOLES sertıfıkattaryn aldy, sondaı-aq BIG4-te jumyspen qamtý boıynsha úzdik top-5 ýnıversıtet quramyna endi. Onymen qosa, ýnıversıtettiń bilim berý baǵdarlamalarynyń kópshiligi FIBAA halyqaralyq agenttigimen akkredıttelgen.
