Memlekettik keńesshi Erlan Qarın Parlament Májilisindegi saıası partııalardyń alty frakııasynyń jetekshilerimen kezdesý ótkizdi, dep habarlaıdy "Adyrna" ulttyq portaly.
Is-sharaǵa «Amanat» partııasy frakııasynyń jetekshisi Elnur Beısenbaev, «Aýyl» HDP frakııasynyń jetekshisi Serik Egizbaev, «Respýblıka» partııasy frakııasynyń jetekshisi Aıdarbek Hodjanazarov, «Aq jol» QDP frakııasynan Azat Perýashev, QHP frakııasynyń jetekshisi Magerram Maharramov, JSDP frakııasynyń jetekshisi Ashat Rahymjanov, sondaı-aq Prezıdenttiń Parlamenttegi ókildiginiń jetekshisi Ámirbek Ospanbekov te qatysty.
«Kezdesý barysynda «Adal adam – Adal eńbek – Adal tabys» taqyrybynda Ulttyq Quryltaıdyń III otyrysynda prezıdenttiń sóılegen sózinde aıtylǵan bastamalary men tapsyrmalaryn tıimdi júzege asyrýdyń sharalary men tetikteri týraly pikir almasý boldy», - delingen Aqorda saıtynda 2024 jyldyń 19 naýryzynda jarııalanǵan habarlamada.
Memlekettik keńesshi Prezıdenttiń kóptegen bastamalaryn is júzinde júzege asyrý zańnamalyq qoldaýdy jáne tutastaı alǵanda depýtattyq korpýstyń belsendi kómegin qajet etetinin atap ótti.
Áńgime, eń aldymen, esirtki óndirý, qumar oıynǵa táýeldilik, buzaqylyq, turmystyq zorlyq-zombylyq úshin jaýapkershilikti zańnamalyq turǵydan kúsheıtý, sondaı-aq memlekettik nagradalar, onomastıka, arheologııalyq qyzmet jáne basqa da birqatar zańdarǵa ózgerister engizý týraly boldy.
Onomastıka, nashaqorlyq, buzaqylyqqa qarsy kúres týraly zań jobalary Májiliste qaralyp jatqany, turmystyq zorlyq-zombylyqqa qarsy kúres týraly zań Májiliste qabyldanyp, Senatqa usynylǵany aıtyldy.
Sonymen birge, buzaqylyq tek eskertkishter men tabıǵı nysandardy qorlaý ǵana emes, sonymen qatar qoǵamdyq oryndarda múlikti búldirý ekeni erekshe atap ótildi. Depýtattar buzaqylyq jáne basqa da turmystyq quqyq buzýshylyqtar úshin jazanyń bultartpastyǵyn kúsheıtýdi jaqtady.
