Qazaqstan Respublikasynyŋ Memlekettık keŋesşısı Erlan Qarin Jaŋa Konstitusiia boiynşa ötıp jatqan jalpyhalyqtyq referendumda dauys berdı. Ol öz taŋdauyn elordadaǧy Ūlttyq akademiialyq kıtaphanadaǧy №129 uchaskede jasady.
– Bügın maŋyzdy kün. Sebebı jarty jylǧa sozylǧan qoǧamdyq diskussiianyŋ bügın nätijesın şyǧaratyn bolamyz. Memleket basşysy ötken jyly Parlamentte halqyna Joldauynda eŋ alǧaş ret bır palataly parlamentke köşu ideiasymen bölısken bolatyn. Sol uaqyttan berı 189 kün qoǧamdyq diskussiialar jürdı. Diskussiialar barysynda azamattardan myŋdaǧan ūsynys kelıp tüstı. Basynan bastap el azamattary joǧary niet bıldırıp, qyzyǧuşylyqpen osy diskussiiaǧa aralasqan bolatyn, – dedı Erlan Qarin.
Sonymen qatar Memlekettık keŋesşı referendumda osy talqylaulardyŋ nätijesı aiqyndalatynyn atap öttı. Onyŋ aituynşa, bügın Qazaqstan azamattary el bolaşaǧyna qatysty şeşım qabyldaidy. Qabyldanatyn şeşımge säikes, qandai qoǧamda ömır süretınımızdı jäne qandai qūndylyqtar negızınde ärı qarai damitynymyzdy aiqyndaimyz. Menıŋ oiymşa, bügın maŋyzdy şeşım qabyldanady dedı ol.
– Būl – soŋǧy tört jylda Memleket basşysy kezınde ötken üşınşı referendum. Elımızge qatysty maŋyzdy şeşımder jalpy halyqtyq dialog, referendum arqyly şeşıluı kerek degen qaǧidat kündelıktı saiasi ömırımızdıŋ normasyna ainaldy. Sondyqtan būl jaǧynan Qazaqstan basqa memleketterge de ülgı körsetıp otyr dep oilaimyn. Osyndai syndarly, jan-jaqty dialog qūru jäne qoǧamdyq-saiasi ömırdıŋ joǧary dinamikasy tūrǧysynan maŋyzdy qadam, – dedı Erlan Qarin.
