Búgin – Kórisý kúni. 14 naýryzda elimizdiń batys óńirleri Naýryz meıramynyń basy Kórisý merekesin atap ótip jatyr.
Bul kúndi Amal merekesi dep te aıtady. Halyq qystan aman-esen shyqqanyna, kóktemge aıaq basyp, týys-týǵan, kórshi-kóleńmen júzdeskenine qýanyp, qol alysyp, tós qaǵysady. Bir-birine degen arazdyq, ókpe-renishti umytyp, amandyq tileıdi.
Shyǵys elderiniń kezindegi kúntizbesi boıynsha naýryzdyń bastalýy hamal (amal) aıynyń 1 juldyzy bolyp esepteledi. Hamal dep otyrǵanymyz Toqty shoqjuldyzynyń eski parsysha ataýy. Kún men tún teńelip, amal kirgen sátte Toqty shoqjuldyzy týady degen uǵym qalyptasqan.
«Naýryz» sózi «jańa kún» degendi bildiredi. Ertede qazaq bul kúndi «naýryz» demeı «amal» degen. Bul sózderdiń aıyrmashylyǵy joq deýge bolady. Al bul qazirgi kúntizbe boıynsha 14 naýryzǵa sáıkes kelip otyr.
Kórise otyryp, bir-birine «Bir jasyńmen!», «Jasyń qutty bolsyn!», «Jasyń qaıyrly bolsyn!» dep aıtý kerek. Adamdar úı ishin jýyp, tazalap, aýlany da retke keltirip qoıady.
