مەملەكەت باسشىسى قاسىم-جومارت توقاەۆ قازاقستاندىقتاردى العىس ايتۋ كۇنىمەن قۇتتىقتادى، دەپ حابارلايدى «ادىرنا» ءتىلشىسى.
پرەزيدەنتتىڭ ايتۋىنشا، بۇل مەرەكە بەرەكە-بىرلىگىمىزدى بەكەمدەي تۇسەدى.
«وسى كۇنى ەلىمىزدىڭ ازاماتتارى ءبىر-بىرىنە ەرەكشە ءىلتيپات كورسەتىپ، ريزاشىلىعىن بىلدىرەدى. سونداي-اق تاتۋلىق، ىنتىماق، دوستىق سىندى قاستەرلى قۇندىلىقتار جان-جاقتى دارىپتەلەدى. مۇنىڭ ءبارى ۇلتتى ۇيىستىرۋدىڭ ۇتىمدى جولى ەكەنى ءسوزسىز.
حالقىمىزدىڭ ۋاقىت سىنىنان وتكەن جاناشىرلىق، قامقورلىق، مەيىرىمدىلىك سياقتى اسىل قاسيەتتەرى، اسىرەسە قيىن-قىستاۋ كەزدەردە ايقىن كورىندى. بۇگىندە مەملەكەتىمىزدە اۋقىمدى وزگەرىستەر بولىپ، ادىلەتتى قازاقستاندى قۇرۋ جولىندا ناقتى قادامدار جاسالىپ جاتىر. وسىنداي سىندارلى ساتتە ەلدىك مۇددەنى بارىنەن بيىك قويىپ، ىرىس-ىنتىماعىمىزدى ساقتاۋ وتە ماڭىزدى»،—دەدى ول.
قاسىم-جومارت توقاەۆ ەل بولاشاعىنا سەنەتىنىن اتاپ ءوتتى.
«ءبىز وزىق ويلى ۇلت رەتىندە كوزدەگەن بارلىق بيىك ماقساتتارعا قول جەتكىزەتىنىمىزگە كامىل سەنەمىن. وسى ورايدا تىنىمسىز تەر توگىپ، قازاقستاندى كوركەيتۋگە ءوز ۇلەسىن قوسىپ جۇرگەن ازاماتتارعا العىس ايتامىن. بارشاڭىزعا باق-بەرەكە جانە مول يگىلىك تىلەيمىن! ەلىمىز امان، جۇرتىمىز تىنىش بولسىن!»،—دەپ تۇيىندەدى ول.
العىس ايتۋ كۇنى 2017 جىلى سول كەزدەگى پرەزيدەنت نۇرسۇلتان نازارباەۆتىڭ جارلىعىمەن بەكىتىلدى. بۇل مەرەكە مىنانداي وقيعالارعا نەگىزدەلدى. 1995 جىلدىڭ 1 ناۋرىزىندا قازاقستان حالقى اسسامبلەياسى قۇرىلدى. ال 2015 جىلى اسسامبلەيانىڭ 20 جىلدىعىندا پرەزيدەنت نازارباەۆ بۇل كۇندى كوپتەگەن حالىقتار ەلگە كۇشتەپ قونىستاندىرىلعان كەزدە توزىمدىلىك پەن قوناقجايلىلىق تانىتقانى ءۇشىن قازاقتارعا العىس بىلدىرە الاتىن كۇنى دەپ جاريالاۋدى ۇسىنعان.
