Májilis depýtaty, zańger Baqytjan Bazarbek sot sheshimin tappaı, nazardan tys qalǵan eldegi birneshe quqyqtyq faktilerdi atap QR Premer-mınıstri men Bas Prokýrorǵa depýtattyq saýal joldady, dep habarlaıdy “Adyrna” ulttyq portaly.
Depýtat jer jáne qurylys salasyndaǵy oryndalmaı otyrǵan sot sheshimderine qatysty máseleni qozǵady. Almaty qalasyndaǵy birneshe zańsyz dep tanylǵan turǵyn úı keshenderiniń áli kúnge deıin sot sheshimin tappaı otyrǵanyn basa aıtty:
“Almatyda "Shveıarııa", "Graf", "Lıýksembýrg", "Franýzskıı dom" sııaqty turǵyn úı keshenderi boıynsha sottyń zańdy kúshine engen sheshimi boıynsha zańsyz dep tanylsa daǵy, sottyń sheshimin oryndaýǵa memlekettiń qaýqary jetpeı tur. Bostandyq aýdanynda Eski Qazaqstan ókilderine tıesili Halyq bank, Qusa-halyq ıeliginde bolǵan ózenniń sý qorǵaý aýmaǵyna kiretin kólemi 52 gektar jer ýchaskesin sottyń zańdy kúshine engen sheshimi boıynsha memlekettik menshikke qaıtarylǵan bolatyn” dedi ol.
Is júzinde jer qaıtarylsa da, qurylys jumystaryn eshkim toktata almaı jatqanyn qosa ketti ol.
Sondaı-aq, Baqytjan Bazarbek burynǵy ıeleri sý qorǵaý aımaǵyn ózen arnasymen birge topyraqpen tegistep, kóp qabatty turǵyn úıdi kóterýge jan jaqty jumys júrgizilip jatqanyn óz kózimen kórip qaıtqan.
“Ataqty Rahat bazarynyń 200 jýyq saýdagerleriniń jer daýyn alyńyz, 2022 jyly Almaty qalalyq soty kezinde Baýyrjan Baıbektiń 3 jyldan keıin zańsyz qaýlysyn buzyp jeńiske jetse daǵy, saýdagerler bazar jerin áli de daýlap ala almaı júr. Al Shymkentte zańsyz SPK "Shymkent" ke berilgen aýmaǵy 77 gektar bolatyn 46 jer telimderin jergilikti Jer ınspektorlary sotqa berip, zańsyz shyǵarylǵan ákimderdiń qaýlylary men jalǵa alý sharttaryn buzdy” dedi Baqytjan Bazarbek.
Atalmysh jaıttarǵa qaramastan Shymkent qalasynyń ákimdigi áreketsizdik tanytyp otyrǵanyn basa aıtty:
“46 jer ýchaskesinińishinde «Shyǵys Montaj Stroı»mekemesine tıesili jer memlekettik menshikke sottyń sheshimimen qaıtsa daǵy, sottyń sheshimine qaramastan dál sol jerde jańa «Uly dala» turǵyn-úı kesheni qurylysyn bastap ketti. Bul turgyn-úı keshenin soǵýdy toktatyndar degen sottyń sheshimi shyqty, zańdy kúshine endi, biraq ta sottyń sheshimin oryndatýǵa memlekettik organdardyń tisi batpaı otyr. Bul jaǵdaı Hendaı ortalyǵy aımaǵynda kóp qabatty turǵyn úı soǵýǵa berilgen 2 jer telimi sottyń sheshimimen qaıtarylsa da, is júzinde zańdy sheshim taǵy da oryndalmaı otyr” dep qosty ol.
Onymen qosa elordadaǵy zańsyzdyq týraly da tilge tıek etti:
“Astanada "Dýblın", "Sensata bıld" jáne "Vashıngton" turǵyn úı keshenderi qurylys júrgizý ruqsat qujattarynsyz ǵana emes, tipti jerge tıisti quqyqty almaı zańsyz qurylysyn bastap ketken. 2022-2024 jyldary aralyǵynda shyǵarylǵan sottardyń sheshimderine sáıkes elordadaǵy qurylysty toqtatý jáne kóterilgen turǵyn-úılerdi súrý mindettelse de, sottyń sheshimin oryndaıtyn kompanııa joq” dedi depýtat.
Baqytjan Bazarbek elimizdiń 3 iri negizgi qalalaryndaǵy GASK salasyndaǵy ýákiletti organdary, qala prokýratýralary, ádilet Departamentteri men KDS-i bar, shyǵarylǵan sot sheshimderin oryndatýǵa, mindetteýge qaýqary jetpeı otyrǵanyna narazylyq bildirdi.
“Prezıdentimiz aıtqandaı Zań dıktatýrasyn ornatý jáne sot sheshimderiniń múltiksiz oryndalýymen ǵana biz – Ádiletti Qazaqstandy ornatamyz. Sondyqtan, joǵaryda keltirilgen faktiler boıynsha barlyq sheshimder tezarada sot aktileriniń negizinde qabyldanýy tıis” dep aıaqtady depýtattyq saýalyn májilismen.
