Temirtaýda 2 qabatty dúkende gaz jaryldy. Bul týraly Tótenshe jaǵdaılar mınıstrligi málimdedi, dep habarlaıdy “Adyrna” ulttyq portaly.
Oqıǵa búgin saǵat 8:06-da Temirtaý qalasy Vatýtın kóshesinde ornalasqan 2 qabatty dúken ǵımaratynda gaz jarylǵany týraly habarlama túsken. Órt sóndirýshiler barǵan ýaqytta ǵımarattyń tolyq qırap, janǵany anyqtaldy.
«Zertteý jáne barlaý barysynda zardap shekkenderdiń ornalasqan jeri aldyn ala anyqtaldy. Qutqarýshylar úıindilerdi bólshekteýge kiristi. Jumystarǵa TJD jeke quramynan 17 adam, 5 tehnıka jumyldyryldy. Qazir oqıǵa ornyna qosymsha 23 adam men 5 tehnıka bara jatyr.
Saǵat 8:44-te úıindi astynan áıel adam shyǵaryldy. Ol Temirtaý qalalyq aýrýhanaǵa jetkizildi. Jaǵdaıy kúrdeli dep baǵalanyp otyr. Onyń aıtýynsha, úıindi astynda er adam bar. Úıindilerdi taldaý jalǵasyp jatyr», – delingen TJD habarlamasynda.
Saǵat 9:08-de 40 sharshy metr alańda órt oqshaýlandy.
