Birneshe kún buryn 73 jasqa tolǵan aqyn, qazirgi aıtys óneriniń uıymdastyrýshysy, Qazaqstannyń eńbek sińirgen qaıratkeri biraz ýaqyttan beri tósek tartyp, syrqattanyp qalǵan bolatyn. Qazirge kezde aqynnyń jaǵdaıy jaqsy, dep habarlaıdy “Adyrna” ulttyq portaly.
Bul týrasynda aqyn “Tańsholpan” baǵdarlamasynda aıtyp berdi. Onyń aıtýynsha, bul dert – múshel jasynyń synaǵy.
"Qazaqtyń múshel deıtin yrymy bar ǵoı, maǵan sol aınymaı keledi de turady. 13 jasymda ne bolǵanyn bilmeımin, biraq 25 jasymda bir qoıshynyń úıinde attyń ústinde otyrǵan jerimnen qutyrǵan ıt qapty. 37 múshelimde qolymdy syndyryp aldym, 49 múshelimde sheshemdi alyp ketti. 61 jasymda aýrý aınaldyra bastady. Osydan aman-esen shyǵyp ketsem, taǵy biraz júre turatyn shyǵarmyn dep oılaımyn. Týǵan kúnde ýaıym basady, ómir zaýlap ótip bara jatyr ǵoı. Týǵan kún toılaıtyn bala emespin, otbasylyq mereke. Jan-jaqtan kelinderim, týystarym kelip, quttyqtap jatyr. Eki-úsh jyldan beri aýyryp, arbaǵa tańylyp edim. Qazir eptep aıaqqa turdym. Soǵan qýanyp jatyr”, – dep aqyn óz jaǵdaıy týraly aıtty.
Sondaı-aq ol saýyǵyp ketýin halyqtyń tilegi jáne aqjarqyn nıetimen baılanystyrdy. Onyń aıtýynsha, dertine shıpa bolǵan dárini bir kelinshek “túsimde aıan berdi” dep ákelip bergen kórinedi.
“Astana men Almatydan bólek shetelde de em aldym. Ony halyq jaqsy biledi. Bir qyzyǵy, Almatynyń irgesinde kúrishtiń qaýyzynan kapsýla jasaıtyn zaýyt bar eken. Qaraqat degen dırektory toǵyz jyldan beri osy dárini jasap shyǵarady. Bir kúni maǵan habarlasyp, “Túsimde myna dárińdi Júrsin Ermanǵa aparyp ber” dep aıtty deıdi. Maǵan ákelip berdi. Sony ishkeli qan qysymym túsip, qan quramynan qant azaıyp, aıaǵymdy basyp qaldym. Alysqa bara almasam da, taıaǵyma súıenip, eptep júremin. Bir jaǵy oılaımyn, qanshama adam maǵan tilekshi bop, saýlyǵymdy surap jatyr. Sonyń da bir áseri bolǵan shyǵar”, – Qansha halyq maǵan tilektes bolyp, saýlyǵymdy tiledi. Sonyń da bir áseri tıgen shyǵar dep oılaımyn", - dedi Júrsin Erman.
“Adyrna” ulttyq portaly
