«Áıelderdiń quqyqtary men balalardyń qaýipsizdigi týraly» zań jobasynyń tanystyrylymynda Májilis depýtaty Anas Baqqojaev keıbir jaǵdaılarda jábirlenýshilerdiń ózderi zorlyq-zombylyq týdyrýy múmkin degen pikir bildirdi,dep habarlaıdy “Adyrna” ulttyq portaly.
Májilis depýtaty Anas Baqqojaev áıelder quqyǵyn jáne balalardyń qaýipsizdigin qamtamasyz etý týraly zań jobasyn qoldaıtynyn aıtty.
"Áıelge eń jaman erkekter ǵana qol kóteredi. Biraq barlyq janjal uryp-soǵý men tóbelesten týyndamaıdy. Erkekterdi de túsiný kerek. Janjal neden bastalady? Árıne, áıeldiń tili uzyn bolǵandyqtan. Áıelder meni keshirsin, biraq mundaı faktiler de bar. Qazaqta mynadaı jaqsy maqal bar: "Jaqsy áıel – yrys, jaman áıel – urys" deıdi. Sondaı-aq "Erge jaqsy áıel – elge de jaqsy" deıdi. Ókinishtisi, barlyǵymyz qazaqy tárbıeden alshaqtap jatyrmyz", – dedi Anas Baqqojaev.
Ishki ister mınıstriniń orynbasary Igor Lepeha ony qoldamaıtynyn aıtty.
"Tipti áıeldiki durys bolmasa da fızıkalyq emes, basqa joldar arqyly sheshýge bolady. Qandaı sebep bolǵanyna qaramastan, eger ol jaraqattansa, kináli adam jaýap berýge tıis. Kimniń kináli ekeninde qandaı aıyrmashylyq bar. Qylmys jasalsa, qylmysker jaýapqa tartylýy kerek", – dedi Igor Lepeha.
