Óskemende pyshaq jaraqatyn alǵan oqýshylardyń isi tekserilip jatyr, dep habarlaıdy "Adyrna" tilshisi Qazaqparatqa siltep.
Birneshe kún buryn qaladaǵy orta mektepterdiń birinde eregesip qalǵan eki oqýshynyń biri qaltasynan jınalmaly pyshaq alyp, qarsylasyna suǵyp jibergen. Pyshaq alyp júrgen oqýshy da abaısyzda ózin de jaralap alǵan.
ShQO Densaýlyq saqtaý basqarmasy baspasóz qyzmetiniń aqparatynsha jaraqat alǵan oqýshylar qalalyq aýrýhanaǵa jatqyzylǵan. Qazir olardyń jaǵdaıy qalypty.
Al Óskemen qalalyq bilim bóliminiń habarlaýynsha, oqıǵa oryn alǵan mekteptiń dırektoryna qatysty tekserý júrgizilip jatyr.
«Atalǵan fakti boıynsha bilim bólimi qyzmettik tekserý júrgizip jatyr. Mektep ákimshiligi tártiptik jazaǵa tartyldy. Aýrýhanaǵa jatqyzylǵan balalardyń jaǵdaıy turaqty baqylaýda. Mektep dırektoryna qatysty qyzmettik tekserý taǵaıyndalǵan. Qabyldanǵan sharalar týraly qosymsha habarlanatyn bolady», - delingen aqparatta.
