Keshe Qasym-Jomart Toqaev Rımdegi resmı saparynda BUU Dúnıejúzilik azyq-túlik baǵdarlamasynyń atqarýshy dırektory Sındı Makkeınmen kezdesti, dep habarlaıdy “Adyrna” ulttyq portaly Aqordaǵa silteme jasap.
Memleket basshysy azyq-túlik qaýipsizdigi jónindegi Islam uıymy men BUU-ny qosa alǵanda, halyqaralyq uıymdar jelisi boıynsha jahandyq azyq-túlik qaýipsizdigin qamtamasyz etý jáne gýmanıtarlyq kómek kórsetý boıynsha Qazaqstannyń iske asyryp jatqan sharalary týraly baıandady.
"2023 jyly Qazaqstan 6 memleketke 9,2 mıllıon dollar kóleminde gýmanıtarlyq kómek kórsetti. Elimiz Gaza sektoryndaǵy kúrdeli ahýaldy eskere otyryp, Palestına halqyna qaıyrymdylyq sharasy retinde 1 mıllıon dollar bóldi jáne 2 ret gýmanıtarlyq kómek jetkizdi. Sondaı-aq tabıǵı apattan zardap shekken Aýǵanstan, Túrkııa, Pákistan jáne basqa da elderge qarjylaı kómek kórsetti", - delingen jumadaǵy habarlamada.
Sondaı-aq Prezıdent Aýǵanstandaǵy jaǵdaıǵa erekshe nazar aýdaryp, halyqaralyq qaýymdastyqtyń osy eldegi gýmanıtarlyq daǵdarystyń aldyn alýǵa kúsh salýyn jalǵastyrý óte mańyzdy ekenin atap ótti.
Kezdesý sońynda Memleket basshysy Sındı Makkeındi aldaǵy Astana halyqaralyq forýmyna qatysýǵa shaqyrdy.
“Adyrna” ulttyq portaly
