Kásipkerlerdiń aqshany tek qolma-qol qabyldaý týraly talabyna qatysty qazaqstandyqtardyń shaǵymdaryna Qarjy mınıstrliginiń Memlekettik kirister komıteti túsinikteme berdi, dep habarlaıdy "Adyrna" ulttyq portaly Tengrinews saıtyna silteme jasap.
Jańa jyldyń 1 qańtarynan bastap barlyq qazaqstandyqtardyń mobıldi aýdarymdaryn tekserý bastaldy. Al azamattar kásipkerlerdiń taýarlar men qyzmetterdi satý úshin onlaın tólemderdi qabyldaýdan bas tartyp, qolma-qol aqsha talap etip jatqanyna shaǵymdanýda.
Osy máselege qatysty Qarjy mınıstrliginiń Memlekettik kirister komıteti túsinikteme berdi.
"Tólemdi qabyldaýdan bas tartý zańsyz bolyp tabylady, óıtkeni "Tólemder jáne tólem júıeleri týraly" Qazaqstan Respýblıkasy Zańynyń normalarynda tólemniń ártúrli tásilderi kózdelgen - bank kartasy, QR nemese qolma-qol aqsha arqyly (25-bap). Kásipkerlerdiń tólem kartochkalaryn paıdalana otyryp tólemderdi qabyldaýdan bas tartqany úshin ákimshilik jaýapkershilik qarastyrylǵan, birinshi ret - eskertý, qaıtalap buzǵan jaǵdaıda - 40 AEK nemese 147 680 teńge kóleminde aıyppul", - dep jaýap berdi MKK baspasóz qyzmeti.
"Adyrna" ulttyq portaly
