Qazaqstan prezıdenti Qasym-Jomart Toqaev qazaqstandyqtardy Jańa 2024 jylmen quttyqtady, dep habarlaıdy “Adyrna” ulttyq portaly.
“Biz kelesi jyly ulttyń qaıta órleýiniń kýási bolamyz” dep bastady Memleket basshysy Jańa jyldyq quttyqtaýyn.
“Jańa jyl – árdaıym jańa mindetter júkteletin, jańa syn-qaterlerdi eńseretin kezeń. Biz kelesi jyly ulttyń qaıta órleýiniń kýási bolamyz», - dedi Memleket basshysy Qasym-Jomart Toqaev Jańa jyldyq quttyqtaýynda.
Prezıdenttiń aıtýynsha, básekege qabiletti ári damyǵan el bolý úshin áli de kóp ter tógýimiz qajet.
«Jańa jylda memlekettigimizdi nyǵaıtý jáne halyqtyń ál-aýqatyn arttyrý jolyndaǵy júıeli reformalar jalǵasyn tabady. Biz zań men tártiptiń ústemdigin ornyqtyrý úshin keshendi sharalar qabyldaımyz. Memleket tarapynan ónerkásipti, aýyl sharýashylyǵyn, energetıka jáne ekonomıkanyń basqa da salalaryn órkendetýdi kózdeıtin tyń bastamalar qolǵa alynady. Biz áleýmettik jaǵdaıy tómen, kómekke muqtaj jandarǵa árdaıym qamqor bolamyz. Muǵalim, dáriger, qutqarýshy, áskerı qyzmetshi, tártip saqshysy jáne basqa da kásip ıelerine qoldaý kórsetemiz.
Biz jas urpaqtyń jarqyn bolashaǵyna jol ashatyn mańyzdy sheshimder qabyldap jatyrmyz. Jaqynda Ulttyq qordaǵy qarjynyń bir bóligi balalardyń esepshotyna túse bastaıdy. Elimizdiń jastary bolashaqqa nyq senimmen qaraýy kerek», - dedi Q. Toqaev Qazaqstan halqyna quttyqtaýynda.
