Bala quqyqtary jónindegi ýákil Dınara Zakıeva jetim balalarǵa bólinetin áleýmettik turǵyn úıdiń qıyndyqtaryn aıtty, dep habarlaıdy "Adyrna" tilshisi.
Ýákil áleýmettik turǵyn úılerdi bólý kezinde jetim balalarǵa arnalǵan kvotany saqtalmaýy úlken másele ekenin aıtty.
"Qazirgi ýaqytta turǵyn úıge kezekte 645 myńǵa jýyq azamat tur, olardyń ishinde 62,6 myń jetim balalar. Qazirgi ýaqytta jetim balalarǵa jáne ata-ana qamqorlyǵynsyz qalǵan balalarǵa turǵyn úı berýdiń negizgi problemasy-áleýmettik turǵyn úı qurylysynyń qarqyny. Ekinshi másele keıbir oblystarda ákimdikterdiń kvotany (20 %) saqtamaýy", - dedi Zakıeva.
Sonymen qatar, sheneýnik ákimdik basshylyǵyn áleýmettik turǵyn úıdi bólý kezinde kvotalardy saqtamaǵany úshin jazalaýdy da usyndy. Ol sóz sońynda turǵyn úı bólý máselesi bar ekenine ókinish bildirdi.
"Men 18 jasqa tolǵan jetim balalar birden óz úıiniń kiltterin alǵanyn qalaımyn. Ol úshin jetim balalarǵa arnalǵan turǵyn úı satyp alýdyń jańa júıesi men tetigin qarastyrý qajet, Múmkin "Ulttyq qor — balalarǵa" baǵdarlamasy sheńberinde jetim balalarǵa arnalǵan esepteýler kezinde joǵary koeffııentti engizýdi qarastyrý qajet", — dep túıindedi ol.
Zákıeva memleket basshysy maýsym aıynda jetim balalar men ata-anasynyń qamqorlyǵynsyz qalǵan balalarǵa arnalǵan turǵyn úı máselelerin sheshý mindetin qoıǵanyn atap ótti.
