«Memleketke opasyzdyq jasady» degen aiyppen 10 jylǧa sottalǧan qytaitanuşy Konstantin Syroejkin Qasym-Jomart Toqaevtan raqymşylyq jasaudy sūraidy. Būl turaly ol Zona.kz internet basylymynda jariialanǧan maqalasynda aitty, dep habarlaidy «Adyrna» tılşısı.
Ǧalym Qazaqstanda ädıldık ızdeu üşın barlyq mümkındıgın sarp etkenın mälımdep, endıgı ümıtı prezidentte ekenın jetkızdı.
Türmede otyrǧan bes jyl ışınde Syroejkin öz ısıne qatysy bar sudialar men prokurorlardyŋ üstınen ondaǧan şaǧym jazǧan bolatyn. Alaida olardan eşqandai nätije bolmady.
«Qasym-Jomart Toqaevpen bırneşe ret «habarlasuǧa» ärekettendım, bıraq oǧan qol jetkıze almadym»,—dedı ol.
Būǧan deiın sinolog tergeuşıler aşyq derekközder negızınde daiyndalǧan materialdardy onyŋ «qylmystyq äreketınıŋ» dälelı retınde qarastyratynyn habarlaǧan edı. Aituynşa, olarda eşqandai insaiderlık aqparat bolmaǧan jäne Qazaqstannyŋ ūlttyq müddelerıne nūqsan keltırılmegen.
Eske salaiyq, 2019 jyly Konstantin Syroejkin Qylmystyq kodekstıŋ 175-babynyŋ 1-bölımı «Memleketke opasyzdyq jasau» boiynşa kınälı dep tanylǧan edı. Ol — qytaitanuşy ǧalym, köptegen kıtaptyŋ, sondai-aq orys, aǧylşyn jäne qytai tılderındegı myŋnan asa maqalanyŋ avtory. Zertteuşı ūzaq jyldar boiy Qazaqstan Respublikasy Prezidentı janyndaǧy Qazaqstan strategiialyq zertteu institutynyŋ bas ǧylymi qyzmetkerı jūmysyn atqardy.
