Tanymal ánshi Nurlan Ónerbaev buǵan deıin eks-prezıdent Nursultan Nazarbaevtyń keshterin júrgizgenin aıtty. Óner ıesi ol otbasyǵa degen qazirgi kózqarasyn «Bilgen dúrys» baǵdarlamasynda bildirdi, dep habarlaıdy "Adyrna" portaly.
«Men onyń is-sharalarynda óner kórsettim, ol meniń shyǵarmashylyǵymdy joǵary baǵalady. Ol kezde meni prezıdent qatysqan barlyq memlekettik sharalarǵa shaqyratyn. Shalǵaı oblystarda konert bersem de, taýyp alyp, alyp ketetin. Onyń týǵan kúnderi men mereıtoılaryn uıymdastyrdym, únemi sonda boldym», - dep bólisti óner ıesi.
Sondaı-aq Ónerbaev burynǵy prezıdentke degen kózqarasynyń ózgergenin atap ótti.
«Árıne, meniń óz kózqarasym jáne maǵan sáıkes kelmeıtin keıbir tustary bar. Onyń otbasy týraly áńgimelerdiń 80-90 paıyzy shyndyq ekenine senimdimin. Osy ortada bolyp, solardyń sharalaryna qatysyp júrgenimde nıetim taza bolatyn. Men bul adamdar men osy ortanyń el múddesi úshin jumys istep jatqanyna sendim. Mende basqa aqparat bolǵan joq. Endi kóp nárse anyq bola bastady, aldanyp qalǵanyma ókinemin. Men eshkim týraly jaman sóz aıtqym kelmeıdi. Men sendim, qasynda boldym, onyń kóptegen keshterine qatystym, tym kóp boldym desem de bolady», - dep atap ótti Nurlan Ónerbaev.
Eske sala keteıik, buǵan deıin kúıshi Shámil Ábiltaı Nursultan Nazarbaevqa arnap, "Elbasy" kúıin shyǵarǵan bolatyn. Alaıda ol kisige renjigendikten kúıdi órtep jibergenin aıtady. Esesine "Qańtar qyrǵynynan" keıin Toqaevqa arnap jańa kúı shyǵarǵan.
