Búgin tańda Jeltoqsan kóterilisine qatysýshy Kúlimhan Óskenbaeva dúnıeden ozdy, dep habarlaıdy «Adyrna» ulttyq portaly.
Bul týraly aqyn Amanǵazy Káripjan óz Facebook paraqshasynda kóńil aıtyp, jazba jarııalady.
«Jeltoqsan qarlyǵashy jeltoqsannyń 37-shi tańyn búgin baqılyq ǵumyrmen qarsy alǵanyn estip otyrmyz. Jeltoqsan kóterilisiniń qaharman qyzy Kúlimhan Óskenbaevadan (Ýskanbaeva) da aıyrylyp qaldyq. 1986 jyly osy kúnderde alǵan jaraqattyń sońy 37 jyldan soń ózi ákelgen Táýelsizdik merekesin, ıaǵnı dál búgingi tańdy ajal oǵymen qarsy alýǵa májbúrleıdi dep kim oılaǵan», - dep jazǵan aqyn óz jazbasynda.
Kúlimhan Óskenbaeva - Jeltoqsan oqıǵasynyń qaharman qyzy. «Jeltoqsan aqıqaty» patrıottyq qozǵalysynyń belsendi múshesi. Sol jylǵy oqıǵaǵa baılanysty II-toptaǵy múgedegi atanǵan.
Kúlimhan Óskenbaevanyń óz esteliginen:
«18 kúni ózim de basymnan taıaq jedim, qazir II-toptaǵy múgedekpin. Dámetkendi qutqaramyn degende basyma birdeńe tıdi. Kózi-basymdy qan jaýyp ketti. Janymda Aıjan, Perneqyz degen qyzdar bar, esimdi bilmeımin, olar meni qutqaryp qaldy. Dámetkeniń belinen urǵan, áli kúnge deıin bir jaǵy kemis. Alańǵa barǵanda Roza Baǵlanova jylap turyp «Qyzdar, baldarym, ketińder!» dep aıtty. Biz tyńdaǵan joqpyz. «Meniń Qazaqstanymdy» aıtyp, tizerlep otyrdyq. Otyrǵandardy mashına baspaıtyn shyǵar dep edik, oǵan da qaraǵan joq».
«Adyrna» ulttyq portaly
