Astana qalasy polisiia departamentı köşı-qon qyzmetı basqarmasy bastyǧynyŋ orynbasary Äliia Maqaevaǧa qatysty sotqa deiıngı tergeu jürgızılıp jatyr. Būl aqparatty Ūlttyq qauıpsızdık komitetı rastady, dep habarlaidy «Adyrna» tılşısı.
Istıŋ naqty qai bap boiynşa tergelıp jatqany äzırge belgısız.
«Qazırgı uaqytta sotqa deiıngı tergeu jürgızılude. Qylmystyq-prosestık kodekstıŋ 201-babyna säikes özge aqparat jariia etılmeidı», – delıngen habarlamada.
Äliia Maqaeva Reseidıŋ Novgorod oblysynda düniege kelgen. 2001 jyly Oral memlekettık zaŋ akademiiasynyŋ zaŋ fakultetın tämamdaǧan. Işkı ıster organdaryndaǧy eŋbek jolyn Astana qalasyndaǧy Almaty audany ışkı ıster basqarmasynyŋ tärbie jäne kadr jūmysy jönındegı inspektory retınde bastaǧan. 2004–2018 jyldary Esıl audany köşı-qon polisiiasynyŋ aǧa inspektory qyzmetın atqarǧan. Keiın äielderdı zorlyq-zombylyqtan qorǧau mäselelerımen ainalysyp, azamattyq jäne immigrasiia bölımınde erekşe tapsyrmalar boiynşa jūmys ıstegen.
2022 jyldyŋ nauryzynda elordalyq polisiianyŋ köşı-qon qyzmetı basqarmasyndaǧy azamattyq jäne immigrasiia bölımınıŋ basşysy bolyp taǧaiyndalsa, keiın basqarma bastyǧynyŋ orynbasary qyzmetıne köterılgen.
