Ǵylym jáne joǵary bilim mınıstri Saıasat Nurbek «Bilim týraly» zańǵa engizilgen ózgerister týraly aıtty. Sheneýnik shart oryndalmasa, ýnıversıtetter lıenzııasynan aıyrylatynyn málimdedi, dep habarlaıdy «Adyrna» ulttyq portaly.
Mınıstrdiń aıtýynsha, zańǵa ózgerister aǵymdaǵy jyldyń 1 qyrkúıeginde engizilgen. Osyǵan sáıkes, stýdentterdi jataqhanamen qamtamasyz etý boıynsha biliktilik talaptary kúsheıtildi.
«Bıylǵy jyldyń 1 qyrkúıeginen bastap biz «Bilim týraly» zańǵa ózgerister engizdik, stýdentterdi turǵyn úımen qamtamasyz etý, jataqhanamen qamtamasyz etý boıynsha biliktilik talaptaryn qataıttyq. Búgingi tańda mindetti talaptar 70 paıyzdy quraıdy, biz bul kórsetkishti júzge jetkizemiz. Bul mańyzdy shart oryndalmasa, ýnıversıtetter lıenzııasynan aıyrylady jáne bilim berý qyzmetin júzege asyra almaıdy», - dedi Saıasat Nurbek.
Sheneýniktiń aıtýynsha, Qazaqstanda bıyldyń ózinde 10 387 oryndyq 40-tan astam jataqhana paıdalanýǵa beriledi. Bul rette Nurbek stýdentterdiń ózderi jataqhanadan bas tartý faktilerin aıtty. Olardyń tańdaýyna mınıstrlik yqpal ete almaıdy.
«20 myńǵa jýyq stýdent jataqhanada turady. Biz kelisimshartqa otyrǵan jataqhanalardy qadaǵalap otyramyz. Sonymen birge stýdentterdiń baspana tańdaýyn shekteýge quqyǵymyz joq: páter jaldaý, jataqhanada turý. Mundaı esepti júrgizý óte qıyn, is júzinde múmkin emes. Sebebi stýdentterdiń bir bóligi jataqhanadaǵy oryndardan ózderi bas tartady», - dep qosty mınıstr.
«Adyrna» ulttyq portaly
