Prezıdent QHR Memlekettik keńesi Premeriniń orynbasary Dın Sıýesıandy qabyldady. Bul týraly Aqorda málimdedi, dep habarlaıdy “Adyrna” ulttyq portaly.
Kezdesý barysynda qazaq-qytaı strategııalyq seriktestiginiń jaı-kúıi jáne ony damytý perspektıvasy, Prezıdent Qasym-Jomart Toqaev pen QHR tóraǵasy Sı zınpınniń buǵan deıin qol jetkizgen ýaǵdalastyqtaryn eki el úkimetteriniń iske asyrý barysy talqylandy.
Qytaımen ekijaqty qatynasty múlde jańa deńgeıge kóterý Qazaqstannyń mańyzdy strategııalyq basymdyǵy sanalady. Shyn máninde, qazaq-qytaı baılanystary ózara tıimdi memleketaralyq yqpaldastyqtyń úlgisin kórsetedi dep oılaımyn. Biz Qytaıdy óte mańyzdy strategııalyq seriktes retinde qarastyramyz jáne barlyq saladaǵy yntymaqtastyqta naqty nátıjege qol jetkizetinimizge úlken úmit artamyz, – dedi Qasym-Jomart Toqaev.
Memleket basshysy jýyrda ótken joǵary deńgeıdegi úshinshi «Bir beldeý, bir jol» forýmy orasan zor tabysty bolǵanyn jáne QHR tóraǵasy Sı zınpınniń aýqymdy bastamasynyń odan ári damý jolyn aıqyndaǵanyn eske saldy. Prezıdenttiń aıtýynsha, Qazaqstan bul jobany júzege asyrýǵa jan-jaqty atsalysa beredi.
Ózińizge málim, men jaqynda Beıjińge resmı saparmen baryp, Tóraǵa Sı zınpınmen jan-jaqty kelissózder júrgizdim. Joǵary deńgeıdegi kelissózder óte mazmundy boldy jáne yntymaqtastyqty nyǵaıtý jolyndaǵy mańyzdy kezeńge jol ashty. Ózara vızasyz rejım kúshine endi. Kelesi jyl Qazaqstannyń Qytaıdaǵy týrızm jyly bolyp jarııalandy. Bul ózara qarym-qatynas, ásirese jastar úshin óte mańyzdy sheshim dep sanaımyn. Qytaımen aradaǵy yntymaqtastyqty damytý árbir eldiń basymdyqtarynyń biri ekenin taǵy da atap ótkim keledi. Biz bul máselege joǵary deńgeıde mán beremiz, – dedi Memleket basshysy.
Budan bólek, Prezıdent búgin Astanada ótken Qazaqstan men Qytaıdyń Yntymaqtastyq jónindegi komıtetiniń 11-otyrysy saýda-ekonomıka salasyndaǵy birlesken is-qımyldardy ázirleý isinde mańyzdy ról atqaratynyna toqtaldy.
Óz kezeginde Dın Sıýesıan Qasym-Jomart Toqaevqa QHR tóraǵasy Sı zınpınniń sálemin jetkizip, eki jaqty yqpaldastyqtyń damý qarqynyna kóńili tolatynyn aıtty.
Biz memleketter basshylarynyń ýaǵdalastyqtaryn iske asyrý arqyly ózara yntymaqtastyqta jańa nátıjege udaıy qol jetkizýdi maqsat etemiz. Qytaı Qazaqstannyń memlekettik qurylys salasyndaǵy orasan zor jetistikterine shyn júrekten qýanady. Qytaı-Qazaqstan qatynastarynyń tabysty damýy bizdiń ortaq múddemizge tolyq saı keledi, sondaı-aq óńirdegi beıbitshilik pen turaqtylyqqa yqpal etedi. Qytaı tarapy memleketter basshylarynyń qol jetkizgen ýaǵdalastyqtaryn jáne «Bir beldeý, bir jol» bastamasyn joǵary deńgeıde ári sapaly túrde birlesip júzege asyrýǵa daıyn, – dedi QHR Memlekettik keńesi Premeriniń orynbasary.
Kezdesý barysynda saýda, aýyl sharýashylyǵy, ınvestıııa, kólik, logıstıka, energetıka jáne basqa da salalardaǵy ózara yqpaldastyqty nyǵaıtý máseleleri qarastyryldy. Sonymen qatar eki el arasyndaǵy mádenı-gýmanıtarlyq yntymaqtastyqty damytýdyń ózektiligi atap ótildi.
