Qytaılyq ınvestorlar Batys Qazaqstan oblysynan 100 myń gektar jer surap otyr. Olar telimdi jalǵa alý arqyly aımaqta aqbóken etin óńdeıtin zaýyt ashpaqshy. Bul týraly Ortalyq kommýnıkaııalar qyzmetinde ótken brıfıng barysynda oblys ákimi Narıman Tóreǵalıev aıtty, dep habarlaıdy «Adyrna» tilshisi.
Aımaq basshysy qytaılyqtardyń ákimdikke shamamen eki aı buryn júgingenin málimdedi.
«Sheteldikter qazaqstandyq áriptesterimen birge zaýyt salýǵa nıet bildirdi. Bul kásiporyn aqbóken men iri qara mal etin tolyq óńdeýdi josparlap otyr. Biz olardyń usynysyn tyńdap, óz sharttarymyzdy ortaǵa saldyq. Kompanııa aımaqta tirkelýi kerek, sáıkesinshe barlyq salyq shegerimderi aımaq bıýdjetin tolyqtyrady. Zaýyt jergilikti turǵyndardy jumyspen qamtýy kerek. Investorlar óz mindettemelerin oryndaýy tıis. Áıtpese, jer tárkilenedi. Shartqa kelisip, qarjy tapsa, jerdi beremiz. Qorqatyn eshteńe joq, olar jerge ıelik ete almaıdy, qaıta sata almaıdy. Biz úshin óńirge ınvestıııa tartý – basty mindet», – dedi Narıman Tóreǵalıev.
Ákim bul máseleniń kelissózder satysynda ekenin atap ótti.
Aıta keteıik, buǵan deıin qytaılyq ınvestorlarǵa Ulytaý oblysynan 20 myń gektar jer telimi bólingeni aıtylǵan edi. Qazan aıynda Sinohydro, TehnoGrýppServıs kompanııalary jáne Ulytaý oblysynyń ákimdigi arasynda úsh jaqty memorandýmǵa qol qoıyldy. Rásim barysynda josparlanǵan jobalardyń 2060 jylǵa deıin Qazaqstanda kómirqyshqyl gazynyń shyǵaryndylaryn azaıtýǵa jáne kómirtegi beıtaraptyǵyna qol jetkizýge baǵyttalǵany aıtyldy.
