Qazaqstannyń Tuńǵysh Prezıdenti Nursultan Nazarbaevtyń resmı saıty kóńil aıtý jańalyǵymen tolyqty, dep habarlaıdy “Adyrna” ulttyq portaly.
11 maýsymnan keıin Qazaqstanda ótken oqıǵalardyń birinde de qozǵalmaǵan saıt Nursultan Nazarbaevtyń inisi Bolat Nazarbaevtyń qaıtys bolýyna baılanysty kelip túsken kóńil aıtý jedelhattaryn jarııalady.
Aqparat boıynsha, Memleket basshysy Q.Toqaev, Premer-mınıstr Á.Smaıylov, Parlament palatalarynyń spıkerleri, sonymen qatar, Astana jáne Almaty qalasynyń, birqatar óńirdiń ákimderi kóńil aıtqan.
Ózbekstan Respýblıkasynyń Prezıdenti Sh.Mırzıeev B.Nazarbaevtyń qaıtys bolǵany týraly qaıǵyly habardy qatty qaıǵyra qabyldady. «Alladan marqumdy panasyna alýda, al Sizge jáne otbasy múshelerińizge sabyr tileımin», - delingen Ózbekstan basshysynyń jedelhatynda.
Tájikstan Respýblıkasynyń Prezıdenti E.Rahmon óz sózinde Nursultan Nazarbaevqa kóńil aıtyp, jyly sózimen jubatyp, qoldaý bildirgen. «Sizge jáne otbasyńyzdyń barlyq múshesine sabyr men qýat tileımin», - delingen hatta.
BAÁ Premer-Mınıstriniń orynbasary sheıh Mansýr ben Zaıd Ál Nahaıan Qazaqstannyń Tuńǵysh Prezıdentine: «Alla sizge jáne otbasyńyzǵa osy aýyr qazany eńserýge kúsh bersin», - dedi.
Tatarstan Respýblıkasynyń basshysy R.Mınnıhanov óziniń jedelhatynda: «Ajal qaıǵy men qýanyshta janyńyzdan tabylǵan, talaı ómir jolynan ótken jaqyn ári qymbat adamdy alyp ketti», - dep jazdy. «Birge ómir súrgen jyldaǵy jarqyn estelikter, týystar men jaqyndaryńyzdyń, adal dostaryńyzdyń janashyrlyǵy men qoldaýy osyndaı sátte Sizdiń qaıǵyńyzǵa ortaqtasyp, jeńildetýge kómektessin», - dep tiledi Tatarstan Raısy.
Qazaqstannyń Tuńǵysh Prezıdentine birqatar halyqaralyq uıymnyń ókilderi, sonyń ishinde UQShU Bas hatshysy I.Tasmaǵambetov, EQYU-nyń az ulttar isteri jónindegi joǵarǵy komıssary Q.Ábdirahmanov, Eýropalyq qaıta qurý jáne damý bankiniń burynǵy basshysy Sýma Chakrabartı jáne t.b. kóńil aıtty.
Buǵan qosa, Qazaqstannyń Tuńǵysh Prezıdentiniń atyna saıası jáne qoǵam qaıratkerlerinen, depýtattyq jáne dıplomatııalyq korpýstar ókilderinen, elimizdiń dinı qyzmetkerleri men bıznes qoǵamdastyǵynan, sonymen birge, Qazaqstan halqynan kóńil aıtý jedelhattary joldandy.
Sondaı-aq, aqparat kózi, avtorlar jedelhattarynda uzaq jyl boıy Bolat Ábishulynyń qoǵamdyq jáne qaıyrymdylyq jumystaryna belsendi aralasqanyn atady.
“Atap aıtqanda, onyń bastamasymen qurylǵan «Salıqaly Urpaq» qory 2016 jyldan bastap bilim berý, densaýlyq saqtaý, halyqtyń osal tobyna qoldaý kórsetý syndy qaıyrymdylyq jobalaryn júzege asyrǵan. Sonymen qatar, Qor 2022 jyly el Prezıdentiniń bastamasymen qurylǵan «Qazaqstan halqyna» áleýmettik qoryna 1 mlrd teńge aýdardy.
Halyq ony ashyq, adal ári jomart adam retinde eske aldy, onyń jarqyn beınesi biletinderdiń jadynda máńgi qalady”, delingen saıtta.
Aıta keteıik, buǵan deıin jarııalanǵan aqparattarda 11 maýsym Abaı oblysyndaǵy qaıǵyly jaǵdaıǵa baılanysty qaza tapqan orman sharýashylyǵy qyzmetkerleriniń otbasyna kóńil aıtylsa, 10 maýsym Nursultan Nazarbaev memleket qaıratkeri Berdibek Saparbaevtyń ómirden ótýine baılanysty aýyr qaıǵyǵa ortaqtasqany jarııalanǵan.
