Taldyqorǵanda tergeý ızolıatorynda otyrǵan jýrnalıst Dýman Muhammedkárimniń isi boıynsha tergeý aıaqtaldy. Bul jóninde jýrnalıstiń advokaty Ǵalym Nurpeıisov Azattyqqa málimdedi, dep habarlaıdy «Adyrna» ulttyq portaly.
– Tergeý amaly bitti. Tergeýshi keshe (10 qarasha – red.) ispen tanysýǵa shaqyrdy. Aıta ketetin nárse, biz áý bastan-aq tergeýshilerge jaýap berýden bas tartqanbyz, óıtkeni munda eshqandaı qylmys quramy joq. Dýman – jýrnalıst. Ony «ekstremıstik uıymnyń isine aralasý jáne «ekstremızmdi qarjylandyrý» boıynsha kinálap otyr. Ony «Qazaqstannyń demokratııalyq tańdaýy» qozǵalysyn qoldap, ıdeıalaryn taratyp otyr dep aıyptaıdy. Biraq Dýmannyń QDT-ǵa eshqandaı qatysy joq... Biz jaýapty sot kezinde beremiz. Sebebi tergeý kezinde aıtsań da, aıtpasań da báribir senbeıdi, – dedi advokat Ǵalym Nurpeıisov.
«Adyrna» ulttyq portaly
