Májilis depýtaty Abzal Quspan Kostenko shahtasynda bolǵan jarylysqa qatysty feısbýk paraqshasynda pikir bildirdi, dep habarlaıdy «Adyrna» ulttyq portaly.
«Búgindikke qınalsam da bir emes, birneshe BAQ ókiline suhbat berýge, birqatarynan bas tartýǵa týra keldi. Aıtar negizgi oılarym ázirge tómendegishe. Ózekti órteıtini – sońǵy jyldary «ArsellorMıttal Temirtaý» óndiris oshaqtarynda bolǵan qaıǵyly oqıǵalar tizbegi kóbeıdi. Osy ýaqytqa deıin «ArsellorMıttal Temirtaýǵa» qarasty ken oryndarynda bolǵan apattan 100-den asa adam qaza tapqan, 150-den asa adam túrli deńgeıdegi jaraqat alǵan. Onyń ishinde jaraqatynyń aýyrlyǵynan múgedek bolyp qalyp, eńbekke jaramdylyq qabiletinen aırylǵandary da bar. Byltyr bir aptanyń ishinde bes jumysshy qaza bolǵany esimizde. Bıyl tamyz aıynda «Kazahstanskaıa» shahtasynda bolǵan órt saldarynan 4 adam baqılyq boldy. Osyndaı kezde Úkimet qaıda qarap otyr degen suraq týyndaýy zańdy», - dep jazdy depýtat.
Depýtattyń sózine sáıkes, bul apattardyń barlyǵy óndiristik qaýipsizdik erejelerin saqtamaýdan týyndaǵan. Bul týraly kompanııaǵa memleket tarapynan talaı aýdıt júrgizilip, monıtorıng jasalyp, kompanııa basshylyǵyna talaı eskertý jasalyp, aıyppuldar salynǵan. Tamyz aıyndaǵy apattan soń, prezıdent aty shýly kompanııanyń ornyna basqa ınvestor tabý týraly Úkimetke tapsyrma bergen. Túndegi apattan soń «ArsellorMıttal Temirtaý» kompanııasymen ınvestıııalyq kelisimdi buzý týraly sheshim qabyldanǵan.
Sondaı-aq bul kópshiliktiń kópten kútken jańalyǵy bolǵanymen, mundaı sheshim bir kúnde qabyldanbaıtynyn, sebebi onyń quqyqtyq astary kóp ekenin jetkizdi. Shamasy, byltyrdan beri júrgizilgen tekserýler men birneshe aıdan bergi kelissózderdiń nátıjesi osyǵan ákelgen.
«Osy tusta eskeretin birneshe másele bar. «ArsellorMıttaldyń» ornyna kim keledi? Otandyq ınvestor bolsa, quba-qup. Ekinshi másele – kompanııaǵa qarasty ken oryndaryna tolyq tekserý júrgizip, eńbek qaýipsizdigin qamtamasyz etý kerek. Memleket úshin azamattardyń ómiri men qaýipsizdigi eń birinshi kezekte turǵan másele. Bul rette prezıdenttiń apat ornyna dereý jetip, bar jaǵdaıǵa ózi qanyǵyp, naqty aqparatty alýy, shuǵyl sheshim qabyldaýy – quptarlyq. Taǵy bir másele – memlekettiń halyqaralyq bıznes-qaýymdastyq aldyndaǵy ınvestıııalyq bet-beınesin saqtap qalý, Qazaqstannyń ekonomıkasyna qarjysyn salýǵa daıyn, óz isine adal sheteldik ınvestorlardy tartý», - dep atap ótti Abzal.
Abzal Quspannyń aıtýynsha, buǵan deıin «ArsellorMıttal» ken oryndaryndaǵy óndiris qaýipsizdigin saqtaýǵa qatysty, jergilikti halyqtyń densaýlyǵyna tıgizgen zııan men qorshaǵan ortany lastaýdy azaıtýǵa qatysty berilgen shaǵymdar men eskertýlerdi durys oryndalmaǵan. Muny dáleldeıtin aıǵaq jetkilikti. Sonda da onymen kelisimshartty birjaqty túrde buzý halyqaralyq deńgeıdegi janjalǵa aparmaýyn qadaǵalaý kerek.
«Keshe ǵana qamaýǵa alynǵan eks-mınıstrdiń isinen belgili: sheteldik kásipker Statımen bolǵan sotta Qazaqstan mıllıardtaǵan shyǵynǵa batty, biraq sonda da jeńiliske ushyrady. Iaǵnı, memleket múddesin kim qalaı qorǵaıdy degen máseleni maıshammen qaraý kerek. Bul oraıda, prezıdenttiń kásibı bıliktiligi, halyqaralyq arenadaǵy tájirıbesi men bedeli kómek bolary sózsiz», - dep jazdy májilis depýtaty.
«Adyrna» ulttyq portaly
