Aqyn, Memlekettik syılyqtyń laýreaty, Qazaqstannyń eńbek sińirgen qaıratkeri, «Parasat» ordeniniń ıegeri Nesipbek Aıtuly dúnıeden ótti. Bul týraly aıtysker aqyn Dáýletkereı Kápuly Facebook paraqshasynda jazdy, dep habarlaıdy “Adyrna” ulttyq portaly.
Nesipbek Aıtuly ulttyq ónerimiz ben mádenıetimizdi órkendetýge súbeli úles qosyp, rýhanııat salasynyń alǵa basýyna kúsh-qaırat jumsady. Qazaqstan táýelsizdiginiń jyrshysyna aınalǵan aqynnyń tartymdy týyndylary oqyrmandar tarapynan joǵary baǵasyn aldy. Ónegeli ǵumyr keship, sońyna mol ádebı-mádenı mura qaldyrǵan Nesipbek Aıtulynyń jarqyn beınesi umytylmaıdy. Marqumnyń ımany salamat, jany jánnatta bolsyn, – dep jazylǵan Toqaevtyń joldaǵan jedelhatynda.
Nesipbek Aıtuly 1950 jyly 22 qyrkúıekte Tarbaǵataı taýynda dúnıege kelgen. 12 jasynda ata-anasymen birge atamekenine oralady. Orta mektepti burynǵy Semeı oblysyna qarasty Barshatas aýylynda oqydy.
Eńbek jolyn Shubartaý aýdandyq «Jańa ómir» gazetinde bastaǵan. 1974 jyly Qazaq Memlekettik ýnıversıtetiniń jýrnalıstıka fakýltetin bitirgen.
1974-1984 jj. «Baldyrǵan» jýrnaly poezııa bóliminiń meńgerýshisi, «Jalyn» baspasynda redaktor, 1984-1994 jj. Qazaqstan Jazýshylar odaǵynda ádebı keńesshi, 1995-1996 jj. «Aqyn» qaýymdastyǵynyń dırektory, 1997-2001 jj. «Qazaq ádebıeti» gazetinde syn bóliminiń, «Juldyz» jýrnalynda poezııa bóliminiń meńgerýshisi bolyp, 2001 jyldan beri Astanadaǵy L.N.Gýmılev atyndaǵy Eýrazııa ulttyq ýnıversıtetinde, Prezıdenttik Mádenıet ortalyǵynda qyzmet istegen.
Sondaı-aq, Nesipbek Aıtuly eks-prezıdent Nursultan Nazarbaev týraly “Báıterek” poemasyn jazdy.
