Májilis spıkeri Erlan Qoshanov depýtat Baqytjan Bazarbekke agressııa jáne ádepsiz áreketi úshin eskertý jasady, dep jazady "Adyrna" portaly.
«Eger jumys isteı almasańyzdar, biz depýtattarmen birge sizdi mınıstrmen qosa mınıstrlikten qýyp shyǵamyz. Biz aıamaımyz», - dedi Bazarbek sársenbi kúni Májilis otyrysynda vıe-mınıstr Ábilqaıyr Tamabekke.
Bul málimdemege jaýap retinde Májilis tóraǵasy Erlan Qoshanov «ózin-ózi usynǵan kandıdatqa» eskertý jasady.
«Baqytjan Jumabekuly, birinshi kezekte, depýtattyq etıka degen bar. Siz qatty ketpeńiz. Agressııasyz sóıleńiz. Ekinshiden, men jaqtap otyrǵan joqpyn, siz qoıǵan suraq durys, 10 mıllıon gektardaı jer qaıtaryldy, bul birinshi kezekte, «Jer Amanaty» komıssııasynyń jumysy. Solaı ma? Al sizdiń suraǵyńyz, jer ádil túrde bólindi me, álde ádiletsiz be? Bul, birinshiden, jergilikti atqarýshy organdarǵa, ekinshiden, ýákiletti organdarǵa, olardyń jaýapkershiligine qatysty másele», - dep atap ótti tómengi palata tóraǵasy.
Ol «Jer amanaty» komıssııasynyń quramyna Bas prokýratýra, Aýyl sharýashylyǵy mınıstrliginiń basshylyǵy, jer resýrstary komıtetiniń basshysy, depýtattar, qoǵam ókilderi kiretinin eske saldy.
«Siz osy komıssııanyń jetekshileriniń birisiz, sondyqtan men sizderge «jalyndy sálem» jetkizgim keledi – Jer Amanaty komıssııasynda osy jerlerdi odan ári ádil bólý máseleleri boıynsha barlyq ókilettikter bar. Kelisesizder me? Sondyqtan bul máseleni jergilikti bılik qaraýy kerek, bul jerde mınıstrliktiń de jaýapkershiligi bar, sonymen birge komıssııa – jerdi qaıtarý jáne bólý máseleleri boıynsha siz de jaýaptysyz. Sizdiń quramyńyzǵa Bas prokýratýranyń ókilderi engizilgen. Taǵy da qaıtalaımyn, komıssııa quramyna barlyq memlekettik organdardyń ókilderi kiredi. Biraq, Baqytjan Jumabekuly, suraq qoıǵanda, bul birinshi ret emes, men palata basshysy retinde reglamenttiń saqtalýyn qadaǵalaı otyryp, sizge eskertý jasaımyn», - dedi Qoshanov.
Aıta keteıik, «Jer amanaty» - Májiliske ózin-ózi usynǵan Baqytjan Bazarbek múshe bolǵan «Amanat» partııasynyń komıssııasy.
