Synşy özıne būiyrmaǧan stipendiiany şäkırtterıne atady

Ädebiet synşysy, professor Qūlbek Ergöbek özıne bölınetın ai saiynǧy mesenattyq stipendiiasyn üş şäkırtıne bölıp beruın ötınıp, Jazuşylar Odaǧynyŋ Basqarma töraǧasy, jazuşy  Mereke Qūlkenge hat joldady. Būl turaly ol Facebook paraqşasynda jazdy, dep habarlaidy “Adyrna” ūlttyq portaly. Synşynyŋ hatyn tömenge jariialaimyz:

Qadırmendı Mereke dos!

    Byltyrdan berı  Menı bır jäitqa köndıre almai jürsıŋder. Byltyr qaraküzde satira sardary Köpen Ämırbektı jerlep kelgen qasırettı künı belgılı mesenat Beket Tūrǧaraev üiınde otyryp Men jaiynda ötınış aittyŋ oǧan.  Bırıŋ aǧa, bırıŋ dos - ekeuıŋ keŋese kele Maǧan ai saiyn 300 myŋ teŋge kölemınde stipendiia töleuge kelıstıŋder! Sūrauşy Sen, jarylqauşy berekelı qoldyŋ iesı, belgılı käsıpker Beket Tūrǧaraev!   Beket aǧa, jalma-jan saryaǧaştyq bır su şyǧaratyn firmasynyŋ emblemasyn körsetıp,  firmanyŋ  aitylǧan qarajatty ai saiyn jeke esebıme audaryp berıp otyratynyn mälımdedı. Men sūraq qoidym: «Qamqorlyǧyŋa rahmet. Bıraq, bız aǧa buynǧa, tıptı qart buyn qalamgerge jatsaq kerek. Mesenattyq stipendiia keleşegı mol daryndy jastarǧa taǧaiyndalmas pa?» Sen «Ädebietke eŋbegı sıŋgen aǧa buynnyŋ denıne derlık mesenattar tarapynan  stipendiia taǧaiyndalatynyn»- aityp Menı sendırdıŋ. Sendırdıŋ de, köndırdıŋ. Aqşasy qūrǧyrdyŋ adam balasyna jüzı ystyq qoi qaşanda. Senıŋ  yqylasyŋa Men de qūladym.  Ömırde qanjyǧalas jürgen, önerde qanattas jürgen, qazaqtyŋ kemeŋger jazuşysy Äbış Kekılbaiūly ainalasynda tärbiesın alyp  bır jürgen Senıŋ Maǧan degen  senımıŋe de, qamqorlyǧyŋa da dän rizamyn. Qūmbyl qoldaǧan Beket aǧaǧa da. Äste,  syilas, syrlas dos-jar jandar  būdan bıraz būryn Menıŋ qyzmettık, tūrmystyq biografiiamda  oryn alǧan bır jaǧdaisyzdyqty eskerıp otyrsyŋdar-au... Ol endı kısılık. Kısılıkke qalai qūl bolmaisyŋ?!       Bıraq, Men byltyrdan berı ol stipendiiany almadym. Bıraq, endı «alaiyn» dep şeştım... Almaǧan sebebım, ystyq yqylasqa  «qūlaǧan» Men suyna kele oilandym. Mesenattyq  stipendiia  ūlt ädebietıne Menen görı ūzaǧyraq qyzmet etetın, keleşegı mol daryndy jasqa berıluı kerek. Bügınınen erteŋı baiandy,  bergenınen alda bererı tıptı joiqyn ümıttı üş qalamgerdıŋ atyn ataimyn  oraiynda. Olar: 1. Ūlarbek Däleiūly (jazuşy) 2. Ümıtbek Baǧdat (aqyn) 3. Narqūlan Raihanūly (aqyn) Bırı Moŋǧoliiadan, ekeuı Qytaidan elım dep emınıp, ükılı ümıtpen kelgen jastar. Eŋ bastysy qazaq ädebietınıŋ ümıtı. Ädebiette körınıp, tıptı tanylyp ülgergen tegeurındı jas talanttar. Būl semız sözdı maman ädebiet synşysy raiynda aityp otyrmyn özıŋe.  Türkıstanǧa kelıp, Q.A.Iаsaui Halyqaralyq qazaq-türık universitetınen laiyqty bılım aluyna qolymnan kelgenınşe yqpal etkenmın kezınde. Tūrmystyq jai-jaǧdaiyna da tiısınşe järdem berdım. «Jaman bergenın aitady...»-dei körmeşı, Mereke! Olardyŋ özderı aǧymdaǧy aqparatta  Menen körgen qamqorlyǧyn aityp, baspasöz betınde tasqa basqan taŋbadai etıp dabyraityp jazyp qoiǧan soŋ jasyra almai otyrǧanym.  Oqu bıtırgen soŋ Türkıstan audanynan jer telımın alyp bergım kelıp, bıraz jügırdım. Basynda kelısken bır  auyldyŋ jempaz  äkımı kün taqaǧan kögentüpte balalardyŋ jer telımıne ötkızgen qūjattaryn joǧaltyp jıberıp, ūiat jasady. Ūiat degen söz az. Öŋırdı tūtas satyp aluǧa qaraǧan ol äkımnıŋ toiymsyz  äreketı – keleşek ūrpaq aldyndaǧy keşırılmes künä, tıptı qylmys der edım. Jä, ony alda şiesın şyǧaryp jazarmyz. Türkıstanym  dep jürek jyryn perzenttık beiılden mazdatyp jazyp  bastaǧan osy perzentterım tūrmys auyrtpalyǧyn kötere almai, qaiysyp, Astana, Almatyǧa baq synap, jol jüruge bel bailap otyr qazırgı taŋda. Mektep ǧimaratyn köteruge sūraǧan jerım tier bolsa, sodan Senderge jer bölıp bereiın degen tılegıme qaramai, aldy jol jürıp kettı.  Türkıstandy köteruge, dūrysy köterısuge 1992 jyldan Almatydaǧy jaily qyzmet, salqyn üi – saluly tösektı tastap,  bırjolata kelgen basym  bauyrymnan öngen perzentımdei köretın daryndy jastardyŋ  jädıger şahardan saia tappai, betı auǧan jaǧyna ketıp bara jatuy – orny tolmas ökınış Men üşın! Bır qazaq qana emes, «küllı türık (türkı emes. Q.E.) düniesıne ruhani astana bolyp ösedı»-dep ülken ümıtpen talmai jazyp kele jatqan Türkıstanyma -  temırqanattanyp qalǧan üş talantty qalam ielerın syiǧyza almai, tūraqtatyp alyp qala almai jan-düniemdı ot-jalyn ökınış örtep barady. Mereke dos, Beket aǧa! Maǧan ūiǧarǧan  ai saiynǧy 300 myŋ teŋge mölşerındegı mesenattyq stipendiiany osy bauyrymnan öngen öz perzentımdei  köretın üş şäkırtıme, aiyna 100-100 myŋnan bölıp, qaita taǧaiyndasaŋyzdar eken. Sonda, Men Sızderdıŋ mesenattyq syilaryŋyzdy alǧan, qabyldaǧan bolamyn! Qazaq ädebietıne, ūlt ädebietınıŋ keleşegıne osy daryndy üş azamat Menen görı qai-da köp, eselei-eselei üles qosaryna senemın! Eger, ǧaiyptan taiyp jomarttyq beiıl oianyp ketıp, Beket aǧa taǧy da 100 myŋ qosar bolsa, jas jary, säbi perzentın qūşaqtap, Almatydan pana tappai tūrmystan qinalyp jürgen daryndy şäkırtım Batyrhan Särsenhandy atar edım...O, ol aişyqty aqyn! Men özım ūstazǧa jaryǧan adammyn. D.A.Qonaev özıne syilaǧan üidı, öz perzentıne emes, Maǧan – şäkırtıne qaldyryp (amanattap) ketken bır Beisekeŋdı – qazaq ädebietınıŋ tarihyna arydan (Türık qaǧanaty däuırınen) bastap 15 ǧasyr qosqan, «Qazaq ädebietı tarihyn zertteuşılerdıŋ pırı» (M.Joldasbekov) atanǧan ūly ūstazym, äkem  professor Beisembai Kenjebaiūlynyŋ bır  özın atasam da auyz tolmas pa, dosym-au!? Menıŋ ǧana ūstazym ba Beisekeŋ? T.Käkışūly, Z.Ahmetov, Z.Qabdol, R.Berdıbai bastaǧan üş buyn ädebietşı ǧalymdardyŋ, Ä.Täjıbaiūly, Ä.Kekılbaiūly, M.Maǧauin, D.İsabekovten tartyp  üş buyn jazuşylardyŋ ūstazy! Şäkırtterın balasyndai köretın edı, jaryqtyq. Şäkırtınıŋ kenjesı, «jamany» myna MEN, Qūlbek Ergöbek! Şäkırtterıme de ökpem joq, şükır! Ūly ūstaz Beisekeŋnen alǧan önegem bolsyn, jastarǧa jolymdy bereiın. Qoldaŋdarşy! Beket Tūrǧaraev ta «joq» demes! Syiaqyny jastardyŋ alǧany – Menıŋ alǧanym dep bılıŋder!      Aiauly dosym Mereke!      Özıŋ QR Jazuşylar odaǧy Basqarma töraǧasy bolyp sailanǧan soŋ, qolqalap Menı Basqarma hatşylyǧy oryntaǧyna otyrǧyzdyŋ. Köpşılıktıŋ ūiǧarymy şyǧar.  Bas tarta almadym. Qolymnan kelgenınşe Jazuşylar odaǧyna qyzmet etemın. Al Jazuşylar odaǧy Töraǧaǧa, Töraǧa orynbasaryna, qatardaǧy hatşylaryna emes, aldymen keleşegı mol tegeurındı jastarǧa qyzmet etsın, qamqorlyq jasasa – jastarǧa jasasyn  dä. Osy jaǧyna yqtiiatty bolaiyqşy jaŋa qūram Jazuşylar odaǧy basşylary! Ūly suretker Ǧabit Müsırepovtıŋ ekıdünie arasynda qinalyp jatyp, aitqan amanatyn ūmytpaiyqşy. «Ūlt ädebietı ūly bolmai – ūlt ūly bolmaidy!» (Ǧ.Müsırepov). Ūlt ädebietın ūlylandyru ūiymdastyra bıluden. Ūlt ädebietın ūlylandyru – asylynda memlekettık ıs. Japon ädebietındegı  ürdıstı eske alaiyq. Ūlt ädebietın ūlylandyrudyŋ bır joly - jas daryndarǧa qamqorlyq jasau!

                       Sälemmen, Qūlbek Ergöbek!