Jetisý oblysynda ótken 7 aıda shaǵyn jáne orta bızneste jumys istep turǵan sýbektiler sany 59,9 myńǵa jetti, oǵan memlekettik qoldaý sharalarynyń da yqpaly bolǵany sózsiz. Jalpy, kásipkerlikti damytý jónindegi ulttyq joba aıasynda 2023 jylǵa óńirde ShOB-ty qoldaýǵa 6,8 mlrd. teńge bólindi.
Memleketten qoldaý kórgenderdiń biri - Tekeli qalasynyń turǵyny Lıýdmıla Kýzneova, ol - erekshe qajettiligi bar bala tárbıelep otyrǵan ana. Ol 1 mln. 380 myń teńge kóleminde grant alyp, 8 sporttyq velosıped pen olarǵa qajetti qosalqy bólshekter satyp aldy. Sóıtip jalǵa berý pýnktin ashty.
Kásipkerdiń aıtýynsha, bir kezderi búkil otbasymen birge velosıpedpen taýǵa shyqsaq dep armandaǵan kezde osy kásipti bastaý týraly oı týǵan. Keıin bajaılap qarasa, Tekelide velosıpedterdi jalǵa alatyn oryndar joq eken:
- Jeke bıznes ashýǵa memleketten qoldaý beriletinin tanystarymnan estidim de, bıznes negizderi týraly oqýdan óttim, bıznes-josparymyzdy daıyndap, ony komıssııaǵa usyndyq. Bizdiń ıdeıamyzdy qoldady. Biz grant jeńip alyp, iske kiristik. Velosıped satyp alýǵa árkimniń jaǵdaıy kele bermeıdi, sondyqtan qajettilik týyp jatsa, turǵyndardyń bizge kelýine bolady. Velosıpedti jalǵa alý quny 500 teńgeden bastalady. Baǵa paıdalaný ýaqytyna baılanysty belgilenedi. Velosıpedti jalǵa beretin shatyrymyz qalalyq saıabaqqa qarsy bette ornalasqan. Qazir bizge otbasylarymen keledi, biz oǵan qýanamyz. Óıtkeni, ashyq aspan astynda velosıped tebý densaýlyqqa paıdaly. Bul - balalardy smartfon men basqa gadjetterden alshaqtatýdyń jaqsy tásili. Bizdiń Tekeliniń tabıǵaty keremet. Ekologııalyq velotýrızmdi uıymdastyrsam degen maqsatym bar, – dedi L.Kýzneova.
Jalpy mundaı granttar isin jańa bastaǵan kásipkerlerge, áleýmettik osal toptar sanatyndaǵy azamattarǵa jaqsy qoldaý. Bul sharalar turǵyndardyń ózderin turaqty tabyspen qamtamasyz ete otyryp, óndiristi jolǵa qoıýǵa jáne damytýǵa múmkindik beredi.
Oblystyq ekonomıka jáne bıýdjettik josparlaý basqarmasynyń derekteri boıynsha Kásipkerlikti damytý jónindegi ulttyq joba sheńberinde 2023 jylǵa 6,8 mlrd. teńge bólindi (JB – 723,7 mln., RB – 6,1 mlrd. tg.). Qazirgi kezde 15 mlrd. teńgege 335 joba maquldandy, paıyzdyq mólsherlemeni sýbsıdııalaýǵa 5,8 mlrd. teńge bólindi, kredıttik somasy 13,3 mlrd. teńgege 196 joba maquldandy, 75 jańa jumys orny quryldy; ishinara kepildik berýge 0,8 mlrd. teńge bólindi, 1,7 mlrd. teńgege 139 joba maquldandy, 40 jańa jumys orny quryldy; 5 mln. teńgege deıin granttar berýge 170 mln. teńge qarastyryldy, bul rette konkýrs qarasha aıyna mejelengen, 34 jumys ornyn qurý josparlanýda; ınjenerlik ınfraqurylym júrgizýge 4 joba boıynsha 36,5 mln.teńge bólindi, 10 jumys ornyn qurý josparlanýda.
Jalpy, 2023 jylǵy qańtar-shilde aılarynda ShOB sýbektilerinen oblys bıýdjetine túsetin salyqtyq túsimder 21,8 mlrd. teńge nemese 2022 jylǵy sáıkes kezeńmen salystyrǵanda 135,9% qurady, 2023 jyldyń jospary – 32 mlrd.teńge.
2022 jyldyń qorytyndysy boıynsha jalpy óńirlik ónimdegi shaǵyn jáne orta bıznestiń úlesi 39,3%-ǵa, al osy jyldyń I toqsanynyń qorytyndysy boıynsha 26,5%-ǵa jetti. 2022 jyldyń qorytyndysy boıynsha jumyspen qamtylǵandar sany 102,1 myń adam nemese 2021 jylǵa qaraǵanda 114,7%, 2023 jyldyń jospary - 110,5 myń adam. 2023 jylǵy ónim men kórsetilgen qyzmet kóleminiń jospary - 850 mlrd.teńge.
