«Adyrna» ulttyq-etnografııalyq birlestigi» qoǵamdyq qory QR Aqparat jáne qoǵamdyq damý mınıstrligi qoldaýymen «Azamattyq bastamalardy qoldaý ortalyǵy» KEAQ memlekettik grant aıasynda «Dástúrli rýhanı qundylyqtardy qoldaý jónindegi jumystardy uıymdastyrý» atty áleýmettik jobany júzege asyrýǵa kirisip ketkeli bir aıdyń júzi boldy.
Jobanyń basty maqsaty – ulttyq qundylyqtarymyzdy ulyqtaý, tól tarıhymyz ben ózimizge ǵana tán erekshelikterimizdi eldiń tutqasy sanalatyn jastardyń boıyna sińirýge úles qosý, olardyń boıyndaǵy otansúıgishtik qasıetterdi arttyrýǵa sebepker bolý desek artyq aıtpaspyz.
Qazaq eliniń tuńǵysh prezıdenti N. Á. Nazarbaev «Bolashaqqa baǵdar: rýhanı jańǵyrý» atty bir jyl burynǵy baǵdarlamalyq maqalasynda «Eger jańǵyrý eldiń ulttyq-rýhanı tamyrynan nár ala almasa, ol adasýǵa bastaıdy» dep shegelep aıtqan edi. Sondyqtan da qoǵamdaǵy árbir adam urpaq tárbıesi men otbasy qundylyqtary máselesin árdaıym basshylyqta ustap, jadynan bir sátke de shyǵarmasa eken deısiń... Ulttyq tutastyqty saqtaý, ulttyq mádenıetti damytý, jahandanýda jalpy aǵymǵa ilesip ketpeý mádenıetti saqtaýǵa tikeleı baılanysty. Mádenıet bizde bar, bolǵan jáne bola beredi de. Qazaq mádenıeti jer betinde qazaq degen ult barda jasaı beretini aqıqat. Tek, dástúrli ulttyq qundylyqtarymyzdy umytpaı, umytýǵa jol bermeı, nasıhattaı berýimiz kerek. Jahandanýdyń jan-jaqty áserlerine shekteý qoıyp, ulttyń ózegi sanalatyn otbasylyq qundylyqtardyń ozyq úlgilerin saqtap, qoldaný aıasyn odan saıyn keńeıtip otyrýymyz qajet. Sondyqtan «Dástúrli rýhanı qundylyqtardy qoldaý jónindegi jumystardy uıymdastyrý» jobasynyń bereri mol dep úmittenemiz. Bolashaqqa nyq qadam basý úshin ótkenińdi umytpaý kerek! Sebebi, ulttyq tamyrdan ajyraý jaqsylyq ákelmeıtini sózsiz. Tereńde jatqan ulttyq tamyrdan ajyramaý úshin siz-biz bolyp, ortaq múdde úshin atsalysýymyz kerek-aq!
"Adyrna" ulttyq-etnografııalyq birlestigi
