Búgin Qarasaı aýdany «GULNAR BAQ» demalys jáne sport bazasynda asa kórnekti memleket jáne qoǵam qaıratkeri, úsh márte Soıalıstik Eńbek Eri Dinmuhamed Qonaevtyń júldesine arnalǵan ulttyq at sporty túrlerinen jáne jaǵajaı voleıbolynan Almaty oblysynyń ashyq týrnıri ótti.
Jarystyń ashylý saltanatynda memleket basshysy Q.K.Toqaevtyń quttyqtaý hatyn onyń keńesshisi Málik Nurjanuly oqyp, el prezıdentiniń arnaıy tilegin jetkizdi. Prezıdenttiń quttyqtaý sózinde: «Dinmuhammed Ahmetuly Qonaev – Qazaqstandy uzaq jyl basqaryp, elimizdi órkendetýge ólsheýsiz úles qosty. Halqyna adal qyzmet etip, jurtshylyqtyń ystyq yqylasyna bólendi. Halqymyz uly tulǵanyń elge sińirgen eńbegin eshqashan umytpaıdy. Qapshaǵaı qalasynyń Qonaev bolyp ózgertilýi – sonyń aıqyn dáleli. Ardaqty azamattyń ómir joly óskeleń urpaqqa árdaıym úlgi-ónege bolary sózsiz» - delindi.
Sonymen qatar, atalǵan sharaǵa Almaty oblysy ákiminiń birinshi orynbasary Nurlan Erǵalıuly, memleket qaıratkerleri jáne elimizdiń óner, ǵylym, qurylys, áskerı saladaǵy belgili azamattary qatysyp, izgi tilekterin bildirdi.
Birneshe jyl qatarynan osy jarystyń uıymdastyrylýyna muryndyq bop kele jatqan general-leıtenant Amangeldi Shabdarbaev sahnadan barlyq qonaqtarǵa alǵysyn jetkizdi. Sonadı-aq, Amangeldi Smaǵululyna Almaty oblysy ákimi Marat Sultanǵazıevtiń atynan ulttyq sportty damytýǵa qosqan úlesi úshin Alǵys hat tabystaldy.
Voleıbol jarysyna bıyl 32 komanda qatyssa, báıgege elimizdiń barlyq aımaǵynan sáıgúlikter saıysqa tústi.
Jarys nátıjesi tómendegideı.
Top báıge (15 shaqyrym)
I. Roza aty - ıesi Merhat Bulǵynov (Almaty oblysy, Talǵar aýdany)
II. Bulbul aty - ıesi Arystan Kúdebaev (Almaty oblysy, Jambyl aýdany)
III. Baıan aty - ıesi Álı Nurmuhametov (Jambyl oblysy, Qordaı aýdany)
Alaman báıge (25 shaqyrym)
I. Aısýat aty - ıesi Baqytbek Myrzabaev (Almaty oblysy, Jambyl aýdany)
II. Padısha aty - ıesi Álimtaı Moldaseıtov (Jambyl oblysy, Qordaı aýdany)
III. Saýdııa aty - ıesi Naıl Fahrıev (Jambyl oblysy, Qordaı aýdany)
Jeńimpazdarǵa avtokólik kilti, al júldegerlerge aqshalaı syıaqy tabys etildi.
Sporttyq shara aıaqtalǵan soń 2000 adamǵa as berildi.
