Keleshekte ulttyq qazaq kúresi halyqaralyq olımpıada oıyndarynyń baǵdarlamasyna enýi múmkin. Búginde bul baǵytta kelissiózder júrip jatyr. Bul haqynda «Qazaqstan barysy» qorynyń resmı ókili Dıas Ahmetshárip baıandady, dep habarlaıdy "Adyrna" ulttyq portaly.
Qazaq kúresiniń keleshegi jaıynda:
«Qazaqstan barysy» týrnırin halyqaralyq deńgeıge shyǵarý boıynsha búginge deıin ulttyq sport túrlerin keńinen dáriptep kelemiz. Mysaly, japondyqtardyń sýmo kúresi, tatarlardyń beldesý kúresi, al bizde qazaq kúresi bar. Bizdiń basty maqsat – qazaq kúresin Olımpıada baǵdarlamasyna engizý. Búginde qazaq kúresi elimizben qatar alys-jaqyn shetelde tanymal. «Qazaqstan barysynan» bólek Eýrazııa jáne álem barysyn ótkizip kelemiz», - dedi Dıas Ahmetshárip elordada ótken baspasóz máslıhatynda.
Onyń aıtýynsha, qazaq kúresin halyqaralyq arenaǵa shyǵaratyn ýaqyt keldi. Sonymen qatar, Dıas Ahmetshárip qaı jylǵy Olımpıada oıyndarynda qazaq kúresine jankúıer bola alatynymyzdy boljady:
«Qazir bul baǵytta jumys júrip jatyr. Múmkin 2028 jyly, múmkin 2032 jyly bolyp qalar», - dedi ol.
"Adyrna" ulttyq portaly
