Qazaqstan quramasy teńbil top dodasyn tabysty bastady. Fýtboldan 2024 jylǵy Eýropa chempıonatyna irikteý kezeńinde Qazaqstan quramasy Soltústik Irlandııa oıynshylarymen kezdesti. Nátıjesinde, tórtinshi oıyndy da tabysty aıaqtady, dep habarlaıdy "Adyrna" ulttyq portaly.
Kezdesý barysynda eki taraptyń oıynshylary da qaqpa qulpyn buzýǵa tyrysty. Dese de, qaqpany dál kózdeı alǵan joq. Qazaqstandyq fýtbolshy Maksım Samorodov óz múmkindigin qur jiberip aldy. Esepti ózgertetin mundaı sırek sátter Soltústik Irlandııa quramasynda da boldy.
Ekinshi kezeńde oıyn kórki qyza tústi. Matchtyń 88-mınýtynda Abat Aıymbetov ulttyq qurama sapyndaǵy segizinshi golyn soqty.
Osylaısha, Qazaqstan quramasy ırlandııalyqtardan 1:0 esebimen basym túsip, týrnır kestesinde ekinshi orynǵa kóterildi.
Munymen qosa el quramasy synǵa túsetin H tobynda Fınlıandııa San-Marınony 6:0 esebimen tize búktirse, Slovenııa men Danııa 1:1 esebimen teń tarqasty.
Endi qazaqstandyq fýtbolshylar aldaǵy oıynyn 7 qyrkúıekte óz alańynda Fınlıandııaǵa qarsy ótkizedi.
Oraıy kelgende aıta keteıik, qazaqstandyq aıaq dop sheberleri qatarynan úsh ret jeńiske jetip otyr. 2024 jylǵy Eýropa chempıonaty irikteý satysynda Qazaqstan quramasy H tobynda úsh oıyn ótkizdi. Óz alańynda Slovenııadan 1:2 esebimen jeńilip, Danııany 3:2 esebimen tize búktirgen edi. Odan keıin syrt alańda San-Marınony 3:0 esebimen jeńdi.
"Adyrna" ulttyq portaly
