Búgin — qazaqtyń eldigi men rýhanııatyna ólsheýsiz úles qosqan zańǵar jazýshy Muhtar Áýezovtiń qaıtqan kúni.
Qazaqstan ǵylym akademııasynyń tuńǵysh akademıgi 1961 jyldyń 27 maýsymynda Máskeý qalasyndaǵy aýrýhanada ómirden ozǵan edi.
Ol 63 jyldyq ǵumyryn qazaq ádebıetiniń damýyna arnady. Artyna baı mura qaldyryp, eldiń oqý-aǵartý isine, dramatýrgııa salasyna zor úles qosty.
Qazaqtyń birtýar klassık jazýshysy 20 jasynda óziniń tuńǵysh kólemdi týyndysy «Eńlik-Kebek» peasasyn jazdy. Bul týyndy áli kúnge deıin qazaq sahnasynan túspeı keledi.
Dál osy shyǵarmadan keıin Áýezov on shaqty jyl ishinde kóptegen áńgime, povest, pesalarymen kózge tústi. Atap aıtqanda «Qorǵansyzdyń kúni», «Barymta», «Eskilik kóleńkesinde», «Kókserek», «Qyr» áńgimeleri, «Jetim», «Qarash-qarash oqıǵalary», «Qaraly sulý», «Qıly zaman» sekildi prozalyq shyǵarmalary oqyrman nazaryn birden ózine aýdardy.
«Abaı joly» roman-epopeıasy —jazýshynyń eń kólemdi ári asa kúrdeli shyǵarmasy. Týyndyda klassık jazýshy bir ǵana Abaı obrazy arqyly HIH ǵasyrdyń II jartysyndaǵy qazaq halqynyń ómirin jan-jaqty sýretteıdi.
«Adyrna» ulttyq portaly nazarlaryńyzǵa Muhtar Áýezovtiń qanatty sózderin usynady.
Týmaı jatyp – toldym deme, tolmaı jatyp – boldym deme.
***
Kimde-kim ana tilin, ádebıetin syılamasa, baǵalamasa, ony saýatty, mádenıetti adam dep sanaýǵa bolmaıdy.
***
Jalǵan namys – qasıet emes, ar saqtaǵan – qasıet.
***
Berekeni kókten tileme, etken eńbekten tile.
***
Tózim tamasha sıpat. Biraq sheksiz uzaq tózýge ómir tym qysqa ǵoı.
***
Qaı istiń bolsyn ónýine úsh shart bar: eń áýeli – nıet kerek, odan soń – kúsh kerek, odan soń – tártip kerek.
***
Óz topshylaýym boıynsha, adamnyń qaı minezi qasıetti bolsa, sol minezi mini de bolady.
***
Ul tárbıeleı otyryp, halyqty tárbıeleımiz, qyz tárbıeleı otyryp, ult tárbıeleımiz.
