Premer-mınıstr Álıhan Smaıylovtyń tóraǵalyǵymen ótken Úkimet otyrysynda bıylǵy 1 shildeden bastap qoldanysqa enetin jańa Áleýmettik kodekstiń normalaryn iske asyrý máseleleri qaraldy, dep habarlaıdy «Adyrna» tilshisi.
Premer-Mınıstrdiń aıtýynsha, jańa Kodekste usynylyp otyrǵan sharalar áleýmettik qorǵaý júıesin halyqaralyq standarttarǵa saı qaıta retke keltirýge múmkindik beredi.
«Áleýmettik qorǵaý jáne zeınetaqymen qamtamasyz etý salasy boıynsha barlyq zańnama bir júıege keltirildi. Áleýmettik kodekste kúshi joıylǵan 10 zańnyń negizgi normalary saqtaldy. Sonymen qatar birqatar jańa ereje qarastyrylǵan. Olardyń barlyǵy halyqtyń ómir súrý sapasyn arttyrýǵa baǵyttalǵan», — dedi ol.
Úkimet basshysy Kodekstiń mańyzdy jańalyǵynyń biri zeınetaqyny kezeń-kezeńmen arttyrý ekenin atap ótti. Máselen, bıylǵy 1 qańtardan bastap 2027 jylǵa deıin bazalyq zeınetaqy mólsheri orta eseppen 51%-ǵa ósetin bolady. Iaǵnı, 2 mln-nan astam zeınetker osy qoldaý sharalarymen qamtylmaq. Jalpy qabyldanyp jatqan sharalar 2025 jylǵa qaraı jıyntyq zeınetaqyny orta eseppen 27%-ǵa arttyrýǵa múmkindik beredi.
Sonymen qatar Premer-Mınıstr endi azamattar ózderiniń zeınetaqy aktıvteriniń 50%-yn senimgerlik basqarýǵa berýge quqyly ekenin aıtty. Jınaqtardyń qalǵan bóligi Biryńǵaı jınaqtaýshy zeınetaqy qorynda qalady.
«1 shildeden bastap memlekettik áleýmettik járdemaqy taǵy 14,5%-ǵa ulǵaıady. Jalpy ósim 23%-dy quraıdy. Múgedektik medıınalyq mekemelerge mindetti túrde barmaı-aq jáne rastaý almaı-aq, proaktıvti túrde belgilenetin bolady. Qorytyndyny tájirıbeli dárigerlerden quralǵan táýelsiz sarapshylar beredi», - dedi Álıhan Smaıylov.
Oǵan qosa balaly otbasylardy qoldaý úshin Altyn alqa, «Ana dańqy» jáne «Batyr Ana» nagradalarymen marapattalǵan analarǵa tólenetin járdemaqy mólsheri saralandy. Elimiz boıynsha 90 myńǵa jýyq ana joǵary járdemaqy alady.
Qorytyndylaı kele, Úkimet basshysy járdemaqylardy arttyrýdy, olardyń ýaqytyly ári tolyq kólemde taǵaıyndalýyn qamtamasyz etý qajettigin aıtty.
